صدر مملکت ڈاکٹر عارف علوی نا کشمیری تا یوم حق خودارادیت نا وخت آ کلہو

اسلام آباد۔ 05 جنوری (اے پی پی) صدر مملکت ڈاکٹر عارف علوی پارینے کہ حق خودارادیت انسانی شرف نا بنداوی سوب ءِ، جہانی برادری بھارتی غیر کانودی مقبوضہ جموں و کشمیر نا مظلوم الس نا بابت تینا یخین دہانی و زمواری تے پورو کے، پاکستان کشمیری تا اقوام متحدہ نا سلامتی کونسل نا قرارداد آتا رداٹ حق خودارادیت نا دوئی کننگ نا جہد نا ہروڑاٹ مخ تفی ءِ برجاتخک۔ کشمیری تا یوم حق خودارادیت نا وخت آ تینا کلہو اٹی صدر مملکت پارے کہ ہر سال 5 جنوری ءِ جموں و کشمیر نا مخلوق کن یوم حق خودارادیت نا وڑاٹ اڈتننگک، دادے داہیت انا یات دہانی کرفک کہ جہانی برادری بھارتی غیر کانودی مقبوضہ جموں و کشمیر نا مظلوم الس نا بابت تینا زمواری تیان خن تے اسہ کنڈ کننگ کپک۔ اوپارے کہ 5 جنوری 1949 آ اقوام متحدہ نا کمیشن بھارت و پاکستان (یو این سی آئی پی) قرارداد ءِ منظور کریسس ہرا جموں و کشمیر نا السءِ تینا حق خودارادیت ءِ کاریم اٹ اتنگ کن آجو و منصفانہ استصواب رائے نا اڈتننگ نا ضمانت ایتک۔ صدر مملکت پارے کہ اقوام متحدہ 72 سال مست کروک آ تینا وعدہ غاتے بایدے پورو کے۔ اوپارے کہ حق خودارادیت انسانی شرف نا بنداوی سوب ءِ، داحق آن نمن مننگ دراصل انسانی آجوئی، انسانی حق انا رکھ و مون آ دننگ نا جہانی کنونشن آتیان ہم نمن مننگ ءِ۔ بھارت دا بنداوی انسانی حق انا غٹ آن بھلا مخالف ءِ۔ صدر عارف علوی پارے کہ 5 اگست 2019آن پد آن بھارتی حکومت پدریسہ غیر کانودی واسہ کنڈی گام گیج آتا کمک اٹ غیر کانودی مقبوضہ جموں و کشمیر اٹی خوف و بے چیٹی نا چاگڑد اس ودی کرینے، پنچ سد آن زیات دے آن فوجی گھیڑ، کورونا دین آن پد ہم زند و جان جوڑی کون آ بنداوی حق و انسانی آجوئی تیا سفاکانہ پابندی جہانی ضمیر و تینٹ بھارت نا تشخص کن چیلنج اسے۔ اوپارے کہ جہانی برادری، اقوام متحدہ و انسانی حق انا جہانی ادارہ غاک بھارتی گام گیج آتے مسترد کرینو۔ صدر پارے کہ بھارتی غیر کانودی مقبوضہ جموں و کشمیر اٹ ساڑی حالیت ساڑی آ تاریخ اٹ بدترین ءُ، ہراڑے مخلوق ءِ اوفتا بنداوی حق بشمول اظہار رائے و اسہ جاگہ غا مچ مننگ تون اوار اوار خودارادیت نا حق آن ہم محروم تخنگانے۔ کشمیری الس ءِ کوزہ گیر بھارتی فوج انا کنڈآن اجتماعی سزا تننگ انگ ءِ و ڈیہہ ءِ دنیا ناغٹ آن بھلا فوجی زون جوڑ کننگانے۔ بھارت جہانی کانود و چارمیکو جنیوا کنونشن نا خلاف ورزی کرسا مقبوضہ ڈیہہ نا آبادیاتی پنجرءِ بدل کننگ ءِ۔ اوپارے کہ پاکستان جموں و کشمیر نا مخلوق نا اقوام متحدہ نا سلامتی کونسل نا قرارداد آتا رداٹ حق خودارادیت نا دوئی کننگ نا جہد نا ہروڑاٹ مخ تفی ءِ برجاتخک۔