اقوام متحدہ سلامتی کونسل نا قرارداد آتا رداٹ کشمیر نا ویل انا بے کنڈ ہلوک استصواب رائے کننگ کن تینا کڑد ءِ ادا کے، اسپیکر قومی اسمبلی اسد قیصر

اسلام آباد۔ 05 جنوری (اے پی پی) اسپیکر قومی اسمبلی اسد قیصر پارینے کہ مقبوضہ کشمیر اٹی برجا بھارتی ظلم و جور گھیڑ انسانیت ءِ شرمندہ کرینے، داسہ وخت بسنے کہ اقوام متحدہ 5 جنوری 1949ء آ کشمیر ءِ متنازع ویل اس گوندنگ نا تینا وعدہ ءِ پورو کے۔ سے شنبے نادے آ کشمیر نا 72 می یوم حق خودارادیت نا وخت آ تینا کلہو اٹی پارے کہ اقوام متحدہ سلامتی کونسل نا قرارداد آتا رداٹ کشمیر نا ویل انا بے کنڈ ہلوک استصواب رائے کننگ کن تینا کڑد ءِ ادا کے۔ کشمیر نا ویل ءِ جہانی کہول آ تالان کننگ اٹ ہر حد اسکان کانہ۔ اوپارے کہ کشمیر نا ویل انا آخبت ایسر اسکان جہد برجاسلک۔ کشمیر نا ویل تقسیم ہند انا بے پورو ایجنڈا ءِ، دادے پورو کننگ آن بیدس سویلی ایشیاء ٹی امن ناممکن ءِ۔ کشمیر ایشو ننا حکومت نا اولیت آتیٹی اوار ءِ۔ ساڑی حکومت کشمیری الس نا بنداوی حق ءِ صلب کروک آ باندات آتے مچ آ دنیا ٹی پبی وڑاٹ تالان کننگ ءِ۔ مچ آ دنیا ٹی اڈہلوک آ اسپیکرز کانفرنس آتون اوار ایلو کانفرنس آتیٹی پاکستان کشمیر نا ایشو آ دوٹوک موقف اختیار کرینے۔ مقبوضہ کشمیر اٹی ہراظلم مننگ ءِ اودے نن تینا دڑد و ٹھپ سمجھنہ و محسوس کینہ۔ بھارت نا فاشٹ حکومت اسہ وخت اسے آن کشمیری الس آ ظلم و ستم نا بازار ءِ گرم کرینے، ہر ادنیا نا تاریخ نا بدترین درور ءِ۔ اقوام متحدہ و جہانی برادری آن خواست کینہ کہ او مقبوضہ کشمیر اٹی برجا است ہسون ظلم ءِ تورفنگ اٹ تینا پبی کڑد ءِ ادا کیر۔ کشمیر ننا وجود نا بشخ اسے و نن کشمیر نا آجوئی اسکان تینا جہد ءِ برجاتخنہ۔ کشمیر نا ویل انا دمدستی و آخبتی ایسر ساڑی حکومت نا اولیت آتیٹی اوار ءِ۔ انسانی حق انا جہانی تنظیمک مقبوضہ کشمیر اٹ بھارت نا کنڈآن کروک آ ظلم انا سختی اٹ نوٹس ءِ ہلیر۔ ایل او سی آ بھارت نا کنڈآن پدریسہ سیز فائر نا خلاف ورزی است ہسونی نا سوب ءِ۔ بھارت نا کنڈآن برجا جنگی گنوکی ڈیہہ ٹی امن کن بھلو خطرہ اسے۔ اومیت ءِ سال 2021کشمیر نا آجوئی نا سال جوڑ مریک اوکان پد کشمیری الس اسہ آجوءُ چاگڑد اسے ٹی ساہ ہلنگ کیرہ۔