اسلام آباد۔ 05 جنوری(اے پی پی) پاکستان سری نگر اٹ مسہ کشمیری ورناتا بھارتی کوزہ گیر فوج انا دوتے اٹ عدالت آن ایڑتر خون نا ترندی اٹ مذمت ءِ کرسا بھارت آ زور شاغانے کہ او ہر مسٹ آ کشمیری مزور آتا میت آتے باضابطہ جہہ جاگہ کن وارث آتا حوالہ کے۔ سے شنبے نادے آ ترجمان دفترخارجہ نا رداٹ شہید کشمیری ورنا، اعجاز احمد گھانئی، زبیر احمد لون واطہر مشتاق وانی نا خاہوت و ہمسایہ غاک داہیت ءِ پک کرینو کہ ورنامارک بے قصورئسر۔ ہرا بدبختی اٹ دادے آ سری نگر آ ہناسر ہراڑے او ہندوستانی ریاستی دہشت گردی نا گواچی مسر۔ ترجمان پارے کہ دا انتہائی ظلم و غیر انسانی سلوک ءِ کہ خاہوت نا کنڈآن وار وار آ خواست کننگ آن پد ہم دا ہر مسٹ آ شہید آتا میت آتے مناسب جہہ جاگہ کن اوفتا حوالہ کننگپک۔ داظلم انا اسہ پوسکن ءُ دروشم اسے ہرادے داسہ بھارتی کوزہ گیر فوج کشمیری الس نا عزم ءِ پرغنگ کن کاریم اٹ اتنگ ءِ۔ ولے او دا کوشست اٹی اسُل سرسہب مفک۔ ترجمان پارے کہ بھارتی حکومت نا کنڈآن شہید کشمیری تا میت آتے وارث آتا حوالہ کننگ آن انکار جہانی ضمیر ءِ سرفنگ کن کافی ءِ۔
