وزیراعظم عمران خان، وزارت خارجہ نا غٹ مشنک خلوص نیت اٹ کشمیری تا توار ءِ مچ آ دنیا ٹی تالان کننگ ءُ، وزیر خارجہ مخدوم شاہ محمود قریشی

اسلام آباد۔ 05 جنوری (اے پی پی) وزیر خارجہ مخدوم شاہ محمود قریشی پارینے کہ کشمیری الس تدوک آ 72 سال آن اقوام متحدہ نا کنڈآن حق خودارادیت نا بابت اوفتے تون کروک آ وعدہ غاتیا عملدرآمد نا چاری ءُ، مچ آ پاکستانی قوم،ملکی فوج، پاکستان نا چنا چنا کشمیری تتون ہم کوپہ سلوک ءُ۔ سے شنبے نادے آ کشمیری تا یوم حق خودارادیت (5 جنوری) نا بابت اہم بیان اٹی وزیر خارجہ پارے کہ کشمیری تے حق خودارادیت نا فراوانی نا وعدہ اقوام متحدہ کون آ جہانی ادارہ غاتا ءِ، دا وعدہ تدوک آ 72 سال آن پوروی نا چاری ءِ۔ بھارت حق خودارادیت نا کسر اٹ اڑاند شاغا،دادے لتاڑنگ کن مون انگا کانود ءِ نافذ کرے۔ مخدوم شاہ محمود قریشی پارے کہ بھارت ظلم و جورانا زی آ ظلم کرسا کرے۔ حریت سرکڑدہ غاتے پابند سلاسل کرے، ولے است بڈ ہیت دادے کہ کشمیری تا جوزہ اینو ہم ہموخس پکا ءِ اخس کہ 72 سال مست ئس۔ اینونادے اٹی مقبوضہ کشمیر، آزاد کشمیر و مچ آ دنیاٹی رہینگوک آ کشمیری تے دا کلہو ءِ تننگ خواوہ کہ نن نما حق خودارادیت نا دا اصولی جہد اٹ نم تون تفوک اُن۔ شاہ محمود قریشی پارے کہ نن نما قربانی تے سلام پیش کینہ۔ مچ آ پاکستانی قوم، پاکستان نا فوج، پاکستان نا چناچنا نمتون ہم کوپہ سلوک ءِ۔