کراچی۔ 05 جنوری (اے پی پی) گورنر سندھ عمران اسماعیل پارینے کہ 5 جنوری آ مچ آ دنیاٹی ساڑی کشمیری دا عزم انا درشانی ءِ کیرہ کہ بھارتی کوزہ آن آجوئی دوئی کننگ اسکان اوفتا جہد برجاسلک۔ داہیت ءِ او سے شنبے نادے آ کشمیری تا یوم حق خودارادیت نا وخت آ تینا کلہو اٹی پارینے۔ گورنر سندھ عمران اسماعیل پارے کہ مچ آ دنیا ٹی کشمیری اینو یوم حق خودارادیت اڈتننگ ءُ۔ یات سلے کہ اقوام متحدہ نا سلامتی کونسل 1949اٹ اینو ہی نا دے قرارداد منظور کریسس ہرانا رداٹ کشمیری تےدا حق تننگاسس کہ او تینا منشا نا رداٹ تینا آخبت نا فیصلہ ءِ کننگ کیرہ۔ دادے انا یات اٹ مچ آ دنیا ٹی کشمیری ہرسال 5 جنوری آ یوم حق خودارادیت اڈایترہ۔ یوم حق خودارادیت نا وخت آ گورنر سندھ عمران اسماعیل تینا کلہو اٹی پارے کہ پاکستان کشمیری تے روا حق ملنگ و جہد آجوئی نا سرسہبی اسکان اوفتا سیاسی، سفارتی و اخلاقی مخ تفی ءِ برجاتخک۔ گورنر سندھ مستی پارے کہ نن بھارت نا غیر کانودی کوزہ ٹی جموں و کشمیر نا الس تون بدل مفروک یکجہتی نا درشانی ءِ کینہ و تینا کشمیری ایلم و ایڑھ تے باوری کرفینہ کہ پاکستان مدام اوفتے تون ہم کوپہ سلوک ءِ و سلک۔
