اسلام آباد۔ 04 جنوری(اے پی پی) حکومت تدوک آ سال زرگزران، جان جوڑیم، تعلیم، خارجہ پالیسی، راجی آسراتی تون اوار چندی بشخ آتیٹی نمان سرسہبی و ہدف دوئی کرے، کشمیر نا ویل ءِ گچین وڑاٹ مچ آ دنیا ٹی تالان کننگا، منی لانڈرنگ،دہشت گردی و عصمت دری نا توننگ کن کانود سازی کننگا، اوغان امن بحالی کن پاکستان تینا پبی کڑد ءِ ادا کرے، برآمد آتا است بڈی کن ریلیف پیکج تننگا، جولائی آن نومبر 2020اسکان کرنٹ اکاؤنٹ بیلنس اسہ ارب 60 کروڑ ڈالر سرپلس مس، جولائی آن نومبر 2020اسکان ترسیلات زر انا کچ 27 درسد نا ودکی اتون 11 ارب 80 کروڑ ڈالر و جولائی آن دسمبر 2020اسکان برآمد آتا کچ 5 درسد ودکی اتون 12 ارب 10 کروڑ ڈالر وخت اس کہ جولائی آن اکتوبر 2020ء اسکان بھلا صنعت آتا شرح نمو 6.7 درسد مسنے، درملکی زرمبادلہ نا کوڑیک فروری 2018 آن پد آن 13 ارب ڈالر نا زیات نا بڑزکو انگا کہول آ ئسر۔ ٹیکسٹائل نا صنعت ءِ پورو وڑاٹ فعال کننگا۔ دیامربھاشا و مہمند ڈیم ڈٹ آتیا کاریم برجاءِ، ملخ آتا چٹفنگ کن گچین حکمت عملی اس جوڑ کننگا، پوسکن آ پاکستان ہاؤسنگ ڈٹ انا رداٹ 20 ہزار اُراتا تفنگ کن 100 ارب جتا کننگا، احساس پروگرام نا رداٹ تاریخی ریلیف تننگا، کوویڈ۔ 19 نا دین انا سوب لاک ڈاؤن اٹی 15 ملین خاہوت آتیٹی شفاف وڑاٹ 180 ارب روپئی بشخنگا۔ موسمیاتی بدلی نا زہم تتون مون تننگ و روزگار نا فراوانی کن گرین پیکج تننگا، ملک اٹ وینٹی لیٹرو طبی ازباب آتا تیاری بناکرے، 2021ء ٹی مچ آ ملک اٹی پناہ گاہ تا کچ اٹی ودکی کننگک و ’’کس اس لنگڑ خاچپ‘‘ ڈٹ انا بناءِ کننگ تون اوار اوار غٹ شاری تے یونیورسل ہیلتھ کوریج فراوان کننگک۔ دوشنبے نادے آ وزیراعظم آفس نا میڈیا ونگ انا کنڈآن 2020ء ٹی حکومتی کارکڑد نا بابت جاری جاچ رپورٹ نا رداٹ ملک اٹی کورونا دین آن ودی مروک آحالیت آتون گچین وڑاٹ مون تننگ کن السی جان جوڑی نا بابت قومی سلامتی کمیٹی نا اولیکو وار دیوان اس اڈتننگا و نیشنل کمانڈ اینڈ آپریشن سینٹر ءِ جوڑ کننگا ہرا کورونا دین آن ودی مروک آ حالیت آتون مون تننگ و دا چرجوئی ٹی راہشونی نا فرض ءِ انجام تننگ ءِ۔ حکومت احساس ایمرجنسی کیش پروگرام و ایلو اقتصادی گچینی نا گام گیج آتا کمک اٹ 180 ارب روپئی حقدار بندغ آتیٹی بشخانے وخت اس کہ جم وڑاٹ 12 کھرب روپئی نا ریلیف پیکج اس تسنے۔ حکومت کورونا نا دین آن الس ءِ بچفنگ و کاروباری سرجزآتے برجاتخنگ کن سمارٹ لاک ڈاؤن نا حکمت عملی ءِ اختیار کرے، داکان بیدس تعمیراتی صنعت کن بھلو پیکج اس تسنے ہرانا بنداوی مسخت دیہاڑی دار و مزور تپہ نا روزگار ءِ برقرار تخنگ ءِ۔ حکومت نا دا گچین گام گیج آتا جہانی ادارہ جان جوڑی ہم اعتراف ءِ کرینے۔ رپورٹ نا رداٹ حکومت ملک ءِ آسودہ ریاست اس جوڑ کننگ و ریاست مدینہ نا وڑآ باندات آتے چلیفنگ کن کوشست کننگ ءِ۔ دا چرجوئی ٹی احساس ولشت پروگرام نا بناءِ کننگانے ہراڑآن 70 لکھ خاہوت، زالبول و خصوصی بندغ آتا 20 لکھ خاہوت فائدہ ہرفرہ۔ داڑتون اوار اوار احساس آمدن پروگرام، احساس انڈرگریجویٹس اسکالر شپس نا فراوانی و چناتیٹی غذائی کمتی نا ویل آتا مون ءِ توننگ کن احساس نشوونما پروگرام ہم حکومتی حکمت عملی نا بشخ ءِ۔ کوویڈ۔ 19 نا دین انا سوب لاک ڈاؤن آن زہمی 15 ملین خاہوت ءِ شفاف وڑاٹ 180 ارب روپئی بشخنگانے ہراڑآن راج انا نزور و حقدار تپہ غاتے بھاز ریلیف رسینگانے۔ حکومت جان جوڑی نا بشخ انا گچینی و الس ءِ جان جوڑی نا گچین آسراتی فراوان کننگ کن عملی گام گیج کرینے۔ ہر خاہوت کن جان جوڑی آسراتی کارڈ جاری کننگانے ہرانا رداٹ مچ آ پنجاب اٹی 2021ء نا ایسر اسکان و خیبرپختونخواٹی جنوری 2021ء نا ایسر آ، فاٹا نا اوار مروک ضلع غاتون اوار مچ آ خیبر پختونخواٹی، آزاد جموں و کشمیر و گلگت بلتستان اٹ غٹ سرکاری و نجی ہسپتال آتیان جان جوڑی آسراتی کارڈ تخوک آ 10 لکھ روپئی اسکان سالانہ درمان کرفنگ کیرہ۔ حکومت الس ءِ درمان نا پوسکن آ سراتی فراوان کننگ کن وینٹی لیٹر و سٹنٹس تون اوار طبی ازباب آتا ملک انا تہہ ٹی تیاری نا عمل نا بناءِ کرینے۔ اسلام آباداٹی آئیسولیشن ہسپتال و انفیکشنر ٹریٹمنٹ سینٹر، لیڈی ریڈنگ ہسپتال پشاور اٹی میڈیکل، سرجیکل والا ئیڈ سروسز بلاک نا بناءِ کننگانے۔ ڈسٹرکٹ ہیڈکوارٹر ہسپتال حافظ آباد، ڈسٹرکٹ ہیڈکوارٹر ہسپتال چکوال نا بنداو ءِ تخنگانے۔ داکان بیدس پشاور اٹی 250 کٹ آتا انسٹیٹیوٹ آف کارڈیا لوجی نا ہم بناءِ کننگانے ہراڑآن دا علاقہ غاتا مخلوق ءِ درمان نا گچین و پوسکن آ آسراتی دوبریک۔ تعلیم نا بشخ انا کارکڑد ءِ ہم گچین کننگ کن حکومت پبی گام گیج کرینے و دا چرجوئی ٹی اسہ وڑ تعلیمی نصاب ءِ حتمی دروشم اس تننگانے۔ یونیورسٹی آف حافظ آباد، یونیورسٹی آف چکوال، نمل، نالج سٹی فیزون، سیالکوٹ یونیورسٹی آف اپلائیڈ انجینئرنگ و ٹیکنالوجی نا بنداو ءِ تخنگانے وخت اس کہ ہری پور اٹ پاک آسٹریا فیکو چولے انسٹیٹیوٹ نا بناءِ کننگانے۔ اسہ وڑ تعلیمی نصاب نا 2023 اسکان نفاذ ءِ کننگک۔ موسمیاتی بدلی نا بشخ اٹ حکومت ملک انا غٹ آن بھلا جنگل کندیاں میانوالی ٹی 25 کروڑ نیال خلنگ نا ڈٹ انا بناءِ کرینے ہراڑآن ماحولیاتی ویل آتا مون ءِ توننگ اٹ کمک رسینگک۔ موسمیاتی بدلی نا زہم تتون مون تننگ و روزگار نا فراوانی کن گرین سٹیمولس پیکج تننگانے۔ موسم برسات نا شجرکاری ٹی ہم بھلو کچ اسے آ نیال خلنگانے۔ ملکی تاریخ نا غٹ آن بھلا شجرکاری مہم نا رداٹ 9 اگست 2020آ 35 لکھ نیال خلنگانے۔ شاد انا پیدوار ءِ ودفنگ کن اسہ ارب درخت خلنگ نا ڈٹ ءِ جوڑ کننگانے و ملک اٹ جنگل آتیکن رکھوک علاقہ غاتا کچ اٹ ودکی کننگ انگ ءِ۔ حکومت چاگڑد ءِ سرسوز و شاداب و صاف ستھرا تخنگ کن کلین گرین انڈکس ایوارڈ نا بناءِ کرینے۔ خیبرپختونخوا ٹی ایکوٹورازم کن پروگرام نا بناءِ کننگا۔ ملخ آتا تنکی تون سرسہبی اٹ مون تننگانے۔ وزیراعظم عمران خان اقوام متحدہ نا رداٹ بائیوڈائیورسٹی سمٹ، آسٹرین ورلڈ سمٹ و کلائیمیٹ ایمبیشن سمٹ آن تران کرسا چاگڑد ءِ گچین کننگ و ماحولیاتی ویل اتون مون تننگ کن پاکستان نا گام گیج آتے تالان کرینے۔ ساڑی حکومت الس ءِ ہنکین نا آسراتی فراوان کننگ کن ہم چندی ڈٹ آتا بناءِ کرینے و دا چرجوئی ٹی وزیراعظم عمران خان 100 ارب روپئی نا خڑچ آن پوسکن آ پاکستان ہاؤسنگ اسکیم نا رداٹ 20 ہزار ہنکینی یونٹ آتا تفنگ نا ڈٹ انا بناءِ کرے۔ داکان بیدس علامہ اقبال انڈسٹریل سٹی فیصل آباد نا بنداءِ تخنگا۔ پشاور اٹ بی آر ٹی نا بناءِ کننگا وخت اس کہ کراچی ٹی السءِ گچین آسراتی فراوان کننگ کن کراچی ٹرانسفرمیشن پلان و کراچی پیکج تننگانے وخت اس کہ راوی اربن ڈویلپمنٹ پیکج، تربیلا و منگلا نا تفنگ نا 5 عشرہ غان پد 2 بھلا ڈیم دیامربھاشا و مہمند ڈیم انا تفنگ، آزاد پتن و کوہالہ ہائیڈرو پاور پروجیکٹ آ کاریم برجاءِ۔ مہمند شیخ زید روڈ انا بناءِ کننگانے۔ سی پیک نا رداٹ خصوصی اقتصادی زون جوڑ کننگانے۔ شیخوپورہ قائد اعظم بزنس پارک، بلوچستان و سندھ اٹی ہائی اسپیڈ براڈ بینڈ پروجیکٹ و چکوال نادرن بائی پاس حکومت نا شونداری ڈٹ آتا بشخ ءِ۔ زرگزران نا بشخ اٹی ہم ساڑی حکومت نمان سرسہبی دوئی کرینے۔ جولائی 2020ء آن نومبر 2020اسکان کرنٹ اکاؤنٹ بیلنس اسہ ارب 60 کروڑ ڈالر سرپلس مسنے وخت اس کہ مالی سال 2018 ٹی دا کرنٹ اکاؤنٹ بیلنس نا نسخان 7 ارب 20 کروڑ ئس۔ جولائی آن نومبر 2020اسکان ترسیلات زر انا کچ 27 درسد نا ودکی تون 11 ارب 80 کروڑ ڈالر و جولائی آن دسمبر 2020اسکان برآمد آتا کچ 5 درسد ودکی اتون 12 ارب 10 کروڑ ڈالر وخت اس کہ جولائی آن اکتوبر 2020اسکان بھلا صنعت آتا شرح نمو 6.7 درسد مسنے۔ درملکی زرمبادلہ نا کوڑیک فروری 2018آن پد آن 13 ارب ڈالر آن زیات نا بڑزکو انگا کہول آ مسر۔ رپورٹ نا رداٹ ٹیکسٹائل انڈسٹری داوخت آ تینا پورو کچ اتون چلینگ انگ ءِ۔ 80 ہزار پاور لومز دُوارہ چلینگ نا بناءِ کرینے، 50 ہزار متکن آ پاور لومز ءِ ہم چلیفنگانے وخت اس کہ 30 ہزار پوسکن ءُ پاور لومز ہم پیدوار تننگ ءُ۔ سرمٹ نا صنعت ہم تینا پورو کچ انا رداٹ کاریم کننگ ءِ و سرمٹ نا ہلنگ کن ریکارڈ آرڈر موصول مسنے۔ ملک اٹی گاڈی، موٹرسائیکل،رکشہ، رکشہ غاتا بہا ودنگ ءِ۔ خراج آتا ہلنگ اٹ ہم ودکی مننگ ءِ۔ حکومت صنعت آتیکن انرجی ریلیف پیکج تننگانے تانکہ پائیدار اقتصادی شرح نمو کن برآمد آتے ودفنگ مرے۔ خارجہ پالیسی نا بشخ اٹی ہم ساڑی حکومت اسہ جامع حکمت عملی اس اختیار کرینے۔ وزیراعظم قطر، ملائیشیا نا دورہ ءِ کرے۔ اقوام متحدہ نا سیکرٹری جنرل انتونیوگوتریس، اقوام متحدہ نا جنرل اسمبلی نا صدر وولکن بوزکیر پاکستان نا دورہ ءِ کریر۔ وزیراعظم عمران خان ہم اولیکو وار کابل نا دورہ غا ہنا۔ اوغان امن عمل اٹ پاکستان نا مثبت کڑد ہم برجاءِ۔ اوغان راہشون گلبدین حکمت یار طالبان پولیٹیکل کمیشن نا باسک و اوغان راہشون عبداللہ عبداللہ پاکستان نا دورہ ءِ کریر۔ وزیراعظم عمران خان اقوام متحدہ نا جنرل اسمبلی و داڑتون اوار اوار موسمیاتی بدلی، منی لانڈرنگ و کورونا دین انا حالیت آتا بابت چندی دیوان تیان ہم تران کرے۔ کشمیر نا ویل ءِ ملکی و جہانی کہول آ تالان کننگا۔ 5 فروری آ یوم یکجہتی کشمیر، 13 جولائی آ یوم شہدائے کشمیر، 5 اگست آ کشمیر یوم استحصال و 27 اکتوبر آ یوم سیاہ کشمیر اڈتننگا۔ وزیراعظم عمران خان اِرا وار آزاد جموں و کشمیر نا کانود ساز اسمبلی آن تران کرے۔ داکان بیدس حکومت منی لانڈرنگ، دہشت گردی و جنسی ڈوہ انا توننگ کن کانود سازی ءِ پک کرے۔ سینیٹ نا گچین کاری اوپن بیلٹ و بروک آ لس گچین کاری ای ووٹنگ نا کمک اٹ کرفنگ کن وزیراعظم عمران خان پالیسی نا پڑو ءِ کرینے وخت اس کہ گلگت بلتستان ءِ صوبہ نا درجہ تننگ کن ہم وزیراعظم عمران خان پڑو کرینے۔ وزیراعظم عمران خان الس ءِ جان جوڑی نا گچین و پوسکن آ آسراتی تا فراوانی و راج انا نزور و حقدار تپہ غاتا کمک کن 2021کن خصوصی ہدف مقرر کرینے ہرانا رداٹ 2021اٹی غٹ شاری تے جان جوڑی نا مفت آسراتی فراوان کننگک۔ احساس پروگرام نا رداٹ زوت اسہ پوسکن ءُ ڈٹ’’ اسہ پاکستانی اس ہم لنگڑخاچپ‘‘ انا بناءِ کننگک۔
