ملتان۔ 04 جنوری (اے پی پی) وزیر خارجہ مخدوم شاہ محمود قریشی پارینے کہ یک شنبے نادے آ بہاولپور اٹی پی ڈی ایم نا شوئس ولے اوٹی پاور الوکہ ہنداخاطرآن ای اودے’’پاور شو‘‘ پاپرہ۔ مریم صاحبہ پارے کہ سویلی پنجاب ءِ محروم تخنگا تو ہروئی ءِ دا کہ سویلی پنجاب ءِ محروم دیر اس تخا، تدوک آ کیہی دہائی آن پنجاب اٹ دِنا حکومت ئس، دِنا دور اٹ غیر منصفانہ وڑاٹ سویلی پنجاب نا فنڈ آتے پین جاگہ اس خڑچ کننگا، دِنا دور اٹ دانعرہ نا توار پناکہ’’اساں قیدی تخت لاہور دے‘‘ ، دوشنبے نادے آ اسہ بیان اسے ٹی اوپارے کہ تحریک انصاف نا حکومت تدوک آ دونیم سال انا چنکو وخت اسے ٹی سویلی پنجاب نا بابت اِرابھلو فیصلہ کرے۔ واکدار آتا شیفکو کہول آ گدریفنگ کن ملتان و بہاولپور اٹ اِرا انتظامی سیکرٹریٹ جوڑ کننگا۔ سویلی پنجاب کن خصوصی فنڈ جتا کننگا ہرا سویلی پنجاب نا شونداری و شونہالی آ خڑچ مریرہ۔ نن اولیکو دے آن پاننگ اُن کہ ہمو توار ہرا بھارت نا بیانیہ تون مطابقت تخک داڑآن انت قومی خذمت مننگ کیک۔ داوخت آ ہندوستان ننا سیم تیا گولہ باری کننگ ءِ ہڑدے لائن آف کنٹرول نا خلاف ورزی مننگ ءِ۔ اپوزیشن ءِ معلوم مرے کہ بھارت، پاکستان نا تہہ ٹی دہشت گردی نا پشت پناہی ءِ کننگ ءِ بلوچستان اٹ اسٹ آن پد ایلو واقعہ مننگ ءِ داحالیت آتیٹی ہراتم نم ادارہ غاتیا تنقید کیرے تو نم بھارتی بیانیہ ءِ مون آ دننگ اورے۔ اسٹیبلشمنٹ، مدام آئین و کانود نادنگ اٹ سلسا ریاست نافائدہ غاتا رکھ ءِ کیک۔ درو بلوچستان اٹ مزور آتا خلنگ نا واقعہ افسوزناک ءِ اونا اخس ءِ مذمت ءِ کننگے کم ءِ۔ ہندوستان ہائبرڈ وار فیئر نا کمک اٹ داوڑنا واقعہ غاتے کرفنگ ءِ تانکہ مخلوق اٹ بددلی تالان مرے و پاکستان اٹ مروک آ زرکاری زہمی مرے۔ بلوچستان آن تعلق تخوک آ اپوزیشن نا سرکڑدہ غاک بلوچستان نا باندات آتیٹی است خواہی تخرو مخلوق نا جان ومال انا رکھ اکن کوشست کیر۔ ای یو انفولیب نا چشم کشا انکشاف آک دنیا نا مون آ بسنو۔ دارپورٹ بھارت نا اصلی دروشم ءِ پاش کرینے۔ نن اسہ ڈوزیئر اسے نا کمک اٹ بھارتی دہشت گردی نا بابت اہم شاہدی و راستکی تے دنیا نا مون آ تخانن۔ بھارت نا ہندوتوا پالیسی تا سوب آن سکولرازم نا تصور دفن مسنے۔ اینو بھارت اٹ امتیازی کانود آتا کمک اٹ اقلیت آتے دیوال اٹ خلنگ انگ ءِ۔ مچ آ بھارت اٹ بزغرآک برانز کننگ ءُ۔ اینو جہانی میڈیا ہم پاش آن پاش بھارت نا برخلاف نوشتہ کننگ ءِ۔ کشمیر نا ویل ءِ نن ہر فورم آ ہرفنگ اُن و ہرفسا کینہ و انشاء اللہ حق خودارادیت نا تحریک سرسہبی آن ضرور ہمکنار مریک۔ آسیہ اندرابی صاحبہ تینا تنظیم دختران ملت نا فورم آن کشمیری زالبول آتیٹی اسہ پوسکن ءُ ولولہ اس بیدار کرے کوزہ گیر بھارتی فوج انا دوتیٹی کشمیری زالبول آتا آبروریزی نا برخلاف پبی و گچین توار بڑز کرے۔ دا گچین توار ءِ توننگ کن دروغ انا مقدمہ غاتا کمک اٹ اودے تدوک آ پانزدہ سال آن قید اٹ تخنگانے۔ نن سیکرٹری جنرل اقوام متحدہ، و جنیوا ٹی ہیومن رائٹس کمشنرءِ چھٹی مون تسن و اوفتیان خواست کرین کہ دا غٹ سرکڑدہ غاتے فری و فیئر ٹرائل نا آسراتی تننگے۔ غٹ سیاسی بندی تے دمدستی یلہ کننگے۔ مقبوضہ جموں و کشمیر اٹی برجا انسانی حق انا بھلا خلاف ورزی تا بابت ہیومن راٹس کمشنر نا بے کنڈ ہلوک مون آ بروک آ اِرا انکوائری رپورٹ آتیا عملدرآمد ءِ پک کننگے۔ اقوام متحدہ کمیشن آف انکوائری نا کمک اٹ ڈغاری راستکی تا بابت شفاف و بے کنڈ ہلوک جاست وپاست کرفنگے۔
