اسلام آباد۔ 04 جنوری (اے پی پی) ایشیائی شونداری بینک پارینے کہ پاکستان نا زرگزران سال 2020ء ٹی لچک و استقلال نا درشانی ءِ کرینے۔ داہیت ءِ پاکستان اٹ ایشیائی شونداری بینک انا کنٹری ڈائریکٹر ژیاوہانگ یونگ پوسکن آ سال انا وخت آ تینا کلہو اٹی پارینے۔ اوپارے کہ پاکستان نا حکومت 2020ء، ہرا اسہ مشکل ءُ سال اس ئس،اٹی ملکی زرگزران ءِ مشکل آتیان کشنگ کن گچین کارکڑد نا درشانی ءِ کرینے۔ اوپارے کہ کوویڈ۔19 نا جہانی دین اتون مون تننگ اٹ ایشیائی شونداری بین ہمو اولین کثیر الجہتی شونداری شریدار آتیٹی اوار ئس ہرافک پاکستان ءِ دین اتون مون تننگ کن رکھی ازباب،دوائی وپین کمک فراوان کریر۔ بینک دین اتون مون تننگ کن طبی عملہ ءِ تربیت نا فراوانی ٹی ہم کمک فراوان کرے۔ اوپارے کہ کورونا دین انا ویکسین نا فراوانی ٹی پاکستان تون کمکاری نا باندات آہم گپ وتران مننگ ءِ۔ پاکستان ایشیائی شونداری بینک انا کمکاری لڑانا اولی ملک آتیٹی اوار ءِ۔ ایشیائی شونداری بینک زرگزرانی سوگوی، ودکی، استقلال، و لچک و ملازمت آتا وارخواہی تیٹی ودکی نا کوشست آتا کمک اٹ ملک انا زرگزرانی بحالی نا جہد اٹ پاکستان تون کمکاری کن سنبرینگوک ءِ۔ اوپوسکن آ سال انا وخت آ پاکستان نا الس ءِ مبارکبادی تس و اوفتیکن نیک است خواہی نا درشانی ءِ ہم کرے۔
