اسلام آباد۔ 01 جنوری (اے پی پی) وزیراعظم عمران خان پارینے کہ 2021ء ٹی پاکستانی تے یونیورسل ہیلتھ سروس ایتنہ و اسہ پاکستانی اس ہم لنگڑ خاچپک، کاروبار دوست پالیسی جوڑکینہ، صنعت آتے آسراتی ایتنہ، پاکستانی تے نیزگاری آن کشنگ، صنعت آتا مون آ دننگ، کشاری پیدوار اٹ ودکی کن چین نا آزموندہ غاتیان راہشونی ہلینہ۔ او جمعہ نادے آ داڑے پاکستان اٹ درستی راستی مروک آ گاڈی تا بنائی دود آن تران کریکہ۔ داوخت آ بنجائی وزیر حماد اظہر و جاوید آفریدی ئسک ہم تران کریر۔ وزیراعظم جاوید آفریدی و فیصل آفریدی ءِ مبارکبادی ترساپارے کہ پاکستان اٹ انڈسٹریلائزیشن اٹ گچین شریدار چین ءِ۔ پاکستان اٹ متعین چینی سفیر میئر رہینگانے و دا شونداری نا اہمیت آن معلومدار ءِ، نن پاکستان نا آخبت کن چین آن ہیل کننگ کینہ، اوفتا ترند رفتار شونداری ننکن ماڈل اسے، ہراوڑ چین چنکو وخت اسے ٹی کروڑ آ مخلوق ءِ نیزگاری آن کشا، ہراوڑ صنعتی بشخ ءِ مون آ دریر، ہراوڑ سرمایہ ایسُر اونا دنیا ٹی درور ملیپک۔ وزیراعظم پارے کہ پاکستان ءِ اسلامی فلاحی ریاست اس جوڑ کننگ و پاکستانی تے نیزگاری آن کشنگ حکومت نا بنداوی ہدف ءِ، نن صنعتی اقتصادی زون جوڑ کرینن، پورو کوشست مریک چینی صنعت ءِ داڑے پرکشش آسراتی ایتن و دانگ اتین۔ وزیراعظم پارے کہ ننا بدبختی ءِ کہ 50 سال اٹ برآمد آتا کنڈآ چکار کننگتو، درآمدآک زیات و برآمد آتا کم مننگ نا سوب آن ننے آئی ایم ایف نا کنڈآ ہنوئی تما۔ نن چین تون تولسا اونا برآمد آتا ودنگ نا حکمت عملی آن فائدہ ہرفنہ۔ داڑکن مریس وختی گام گیج آتیان بیدس چین آن گونڈ وختی بنداو تیا کمک ہلینہ۔ وزیراعظم پارے کہ پاکستان کشاری ءُ ملک اسے ولے داڑے کشاری پیدوار کم ءِ، بدبختی اٹ کشت وکشار نا کنڈآ چکار کننگتنے، نن دا بشخ اٹی ہم چین انا آزموندہ غاتیان فائدہ ہرفنہ۔ سی پیک نا بروک آ ریسہ ٹی کشت وکشار ءِ ہم اوار کننگ انگ ءِ، اوپارے کہ آٹوموبائل نا صنعت آن ہراڑے روزگار نا وارخواہی ودی مریک ہموڑے کسبکاری و آٹوپارٹس انا کاروبار اٹ ودکی مریک۔ اوپارے کہ داگاڈی تا مارچ آن بنامریک۔ وزیراعظم پارے کہ چینی کمپنی تتون پین جوائنٹ وینچر کینہ۔ وزیراعظم پارے کہ ہراتم ننے حکومت رسینگا تو چندی چیلنج آک مون تروک ئسر، ننا حکومت نا اولیکو سال زرگزران نا سوگوی نائس و ہراتم زرگزران نا سوگوی کن گام گیج ہرفنگک تو الس ءِ گڑاس تکلیف ہرفوئی تمک، ننا حکومت نا ارٹ میکو سال کوویڈ۔ 19 بس، ہراوڑ نن تینا مخلوق ءِ دا ناجوڑی آن کشان ، زرگزران ءِ ہم سنبھالان و جانی نسخان آن بچفین اوفتا جہانی ادارہ جان جوڑی درور ایتک۔ پاکستان دنیا نا ہمو منہ ملک آتیٹی اوار ءِ ہراڑے گچین حکمت عملی آن نسخان آن بچنگا۔ اوپارے کہ احساس پروگرام آن نیزگار تپہ نا مالی کمک ءِ کننگا اونا درور ملیپک۔ داڑآ ڈاکٹر ثانیہ نشتر مبارکباد نا حقدار ءِ۔ اوپارے کہ کوویڈ۔ 19 نا ارٹ میکو ریسہ تون اوار ایلو چیلنج آک ءُ ولے تینا آزموندہ غان نن دا چیلنج آتون مون تننگ کن تیار اُن، 2021ء ٹی نن شونداری نا کنڈآ روان مرینہ۔ ملک اٹی داوخت آ صنعت آک شون ہلنگ ءُ، سیمنٹ نا بہاٹی ریکارڈ ودکی مسنے، ٹیکسٹائل انڈسٹری چلینگ نا بناءِ کرینے، فیصل آباد و ایلو علاقہ غاتیٹی ٹیکسٹائل مصنوعات آتا داخہ آرڈرز ءُ کہ داڑکن مزور ملپننگ ءِ۔پاکستان برصغیر اٹ ترندی اٹ کوویڈ۔ 19 آن ریکوری دوئی کروک آ ملک ءِ۔ اوپارے کہ 2021ء ٹی نن کاروبار دوست پالیسی جوڑ کروئی ءِ، صنعت ءِ آسراتی تروئی ءِ، داڑآن ہرا زربریک اوفتے مخلوق ءِ نیزگاری آن کشنگ آ خڑچ کینہ۔ وزیراعظم پارے کہ پوسکن آ سال انا اِراہدف ءُ دافتیان اسٹ ہر پاکستانی ءِ یونیورسل ہیلتھ کوریج نا آسراتی تننگ نا ءِ، خیبرپختونخوا، گلگت بلتستان و کشمیر اٹ ہر خاہوت ءِ دا آسراتی دوئی ءِ، پاکستان نا ہر اُراتون ہیلتھ انشورنس مریک و او گچین ہسپتال آتیٹی تینا درمان ءِ کرفنگ کیرہ، داوڑ دنیا نا ہزگارانگا ملک آتیٹی ہم اف۔ وزیراعظم پارے کہ اودے ارٹ میکو ہدف دادے کہ اسہ پاکستانی اس ہم لنگڑ خاچپ، انفارمیشن ٹیکنالوجی نا کمک اٹ علاقہ غاتا پیدواری ءِ کینہ،این جی اوز و سخی تے داٹی اوار کینہ۔
