اسلام آباد۔ 01 جنوری (اے پی پی) وزیراعظم عمران خان پارینے کہ حکومت پاکستان ءِ فلاحی ریاست اس جوڑ کننگ نا کنڈآ ہِننگ ءِ، پوسکن آ سال اٹی کنا اولیت دادے کہ غٹ شاری تے درمان نا آسراتی دوئی مرے و ہچ گہس لنگڑ خاچپ۔ جمعہ نادے آ تینا ٹویٹس آتیٹی وزیراعظم عمران خان پارے کہ کورونا نا دین انا سوب آن سال 2020 ننا و مچ آ دنیاکن بھاز سخت ئس ولے اللہ رب العزت نا احسان اٹ نن گیشتر آن سہل و جوان مسن، نن نئے بیرہ تینا مخلوق ءِ دین آن بچفنگ اٹ ایلوفتا نسبت زیات سرسہب مسن بلکن اوفتے بین آن کہینگ آن بچفین، نن پاکستان ءِ فلاحی ریاست اس جوڑ کینہ۔ وزیراعظم پارے کہ احساس پروگرام نا مسخت نیزگار بندغ ءِ راجی رکھ فراوان کننگ ءِ و جان جوڑی کارڈ اسکیم نا کمک اٹ لس بندغ ءِ درمان نا گچین آسراتی ملک۔ اوپارے کہ کے پی کے و پنجاب اٹ جان جوڑی کارڈ آتا فراوانی برجاءِ و کنا اولیت ءِ کہ غٹ شاری تے دا آسراتی دوئی مرے۔گمان ءِ کہ دا چرجوئی ٹی غٹ صوبہ غاک داپروگرام نا بناءِ کیرہ۔ وزیراعظم پارے کہ دمدستی وڑاٹ’’ہچ گہس لنگڑ خاچپ‘‘ نا سرحال آن ڈٹ اس بناکننگک۔ دا ہڑتوم آ ڈٹ آتیان پاکستان ءِ اینخو سال انا ایسر اسکان فلاحی ریاست اس جوڑ کننگ اٹ کمک رسینگک۔
