اسلام آباد۔ 01 جنوری (اے پی پی) آل پرائیویٹ اسکولز ایسوسی ایشنز سپریم کونسل نا ڈل بنجائی وزیر تعلیم و کسبی تربیت شفقت محمود تون اوڑدہی کرے۔ ڈل انا نمائندگی ءِ افضل بابر، ملک ابرار احمد، چوہدری عبیداللہ، ناصر محمود و ابرار احمد خان ئسک کریر۔ ڈل بنجائی وزیر تعلیم نا غٹ اختہ ئی تے پدبٹسا اوڑدہی کننگ آ منت واری نا درشانی ءِ کرے و اودے تینا خواست و ویل آتے پیش کرے۔ جمعہ نادے آ وزارت تعلیم نا کنڈآن جاری بیان نا رداٹ بنجائی وزیرپارے کہ اینخو سال تعلیم کن غٹ آن مشکل سال گدرینگا۔ تعلیمی ادارہ غاتے بند کننگ نا فیصلہ کنکن غٹ آن زیات تکلیف دہ ئس۔ بنجائی وزیر تعلیم ڈل ءِ پارے کہ وزارت تعلیم تنیا تینٹ ہچ ءُ فیصلہ اس ہلپک بلکن وزارت جان جوڑی نا ڈیٹا و پارت آتے مون آ تخسا فیصلہ کروئی مریک۔ وزیر تعلیم شفقت محمود یوکے کورونا دین ویری اینٹ ہراکہ پاکستان اٹ رپورٹ مسنے، نا بابت ہم معلومدار کرے۔ ہرانا تالانی نا رفتار نان ویری اینٹ کرونا دین آن زیات ءِ۔ بنجائی وزیر تعلیم ڈل ءِ پارے کہ طالب علم آتا کورس آتے پورو کننگ کن 4 جنوری نا میٹنگ اٹی مارچ اٹ مروک آ امتحان تے مون آ دننگ آ فیصلہ کینہ۔ حالیت آتے ہُرسا باسنی تا چھٹی تے کم کننگ نا ہم سوچانن۔ تعلیمی سال ہرا اپریل اٹ بناکیک ءِ اگست اٹ دننگ آہم سلابت کینہ۔ بنجائی وزیر پارے کہ اوغٹ صوبائی وزیر تعلیم آتے 4 جنوری نا بین الصوبائی وزراتعلیم کانفرنس آن مست تینا صوبہ غاتا پرائیویٹ اسکولز ایسوسی ایشن تتون اوڑدہی کننگ نا خواست کرینے و او تینٹ دیوان اٹی پرائیویٹ اسکولز ایسوسی ایشن نا نمائندگی ءِ کیک، اونا پورو کوشست مریک کہ اخس کہ زوت مننگ کرے تعلیمی ادارہ غاتے ملنگے، دارداٹ انشاء اللہ جوان ءُ خبر اس ایتنہ۔ بنجائی وزیر پارے کہ سیاست تینا جاگہ غا ولے تعلیمی فیصلہ غاتے امنائی وڑاٹ کننگ اُن۔ بنجائی وزیر تعلیم ڈل ءِ دا مشکل ساہت اٹ چنکا اسکول آتا کمک ءِ کننگ کن حکومتی گام گیج آتیان ہم معلومدار کرے، دا چرجوئی ٹی وزیراعظم تون ہم ہیت کرین، اوفتیکن مالی امداد و بے سود وام تا فراوانی نا پیکج اس جوڑ کرین ہراکہ داوخت آ وزارت خزانہ ٹی ءِ۔ بنجائی وزیر تعلیم پارے کہ تعلیمی سرجز آتا تعطل نا اخس احساس و تکلیف اودے ارے شاید پین اسٹ ءِ مفروءِ۔ او و اونا وزارت پورو وڑاٹ اوفتے تون سلوک ءِ۔ آل پرائیویٹ اسکولز ایسوسی ایشنز نا ڈل پارے کہ نما وونٹ و است خواہی مدام ننتون مسنے ہراڑآ نن است انا حب اٹ منت واراُن۔ میٹنگ اٹ پارلیمانی سیکرٹری ایجوکیشن وجہیا اکرم، بنجائی سیکرٹری تعلیم فرح حامد خان، ایڈیشنل سیکرٹری محی الدین احمد وانی و ایلوسینئر آفیسر آک ہم ساڑی ئسر۔
