اسلام آباد۔ 01 جنوری (اے پی پی) بنجائی وزیر مواصلات مراد سعید پارینے کہ اپوزیشن کرپشن و دُزی کرسا پاکستان تون اوار مچ آ دنیا ٹی میرات جوڑ کرے، پانامہ دستاویزءِ پاکستان نا میڈیا ہاؤس اس یا نیب جاری کتنے، لندن نا جائیداد آتا بابت بی بی سی نا ڈاکومینٹری جوڑ مس وخت اس کہ نیویارک ٹائمز آرٹیکل ہم نوشتہ کرے، گچین جمہوریت کن میڈیانا مننگ المی ءِ۔ داخیال آتا درشانی ءِ او جمعہ نادے آ ایوان بالا ٹی اپوزیشن نا تحریک آتیا شرہ ٹی بشخ ہلسا کرے۔ بنجائی وزیر مراد سعید پوسکن آ سال انا بناء آ ایوان ناغٹ باسک آتے مبارکبادی تس۔ اوپارے کہ نیب انا بابت نیب انا ترجمان جوان ہیت کننگ کیک۔ اومیڈیا و اینکر آتا بابت بیان آتا مذمت ءِ کرسا پارے کہ میڈیا و صحافی تے ہراوڑاٹ مخاطب کننگا و مچ آ صحافی برادری ءِ متنازعہ جوڑ کننگ او غیر مناسب ءُ ہیت اسے۔ اوپارے کہ مستین اٹ نیب اتون اوار پارلیمنٹ، ایس ای سی پی، ایف بی آر و قومی اسمبلی ءِ تینا مرضی اٹ مخلوق نا برخلاف و تینا کرپشن نا دفاع کن کاریم اٹ اتنگا۔ اوپارے کہ آئی ایم ایف، ورلڈ بینک، ورلڈ اکنامک فورم اٹ ہم پاننگانے کہ دنیا ٹی جمہوریت شفافیت و احتساب نا پن ءِ، گچین جمہوریت کن میڈیا نا مننگ المی ءِ انتئے کہ میڈیا حکومت و سیاستدان تتون اوار کرپشن آ نظر تخک۔ پانامہ پیپرآتا بابت اوپارے کہ دا دستاویز آتے پاکستان نا میڈیا ہاؤس اس یا نیب جاری کتنے، پانامہ پیپرآتا مون آ بننگ آن پد آئس لینڈ نا وزیراعظم استیفہ تس، یوکرائن آن استیفہ بس ولے پاکستان اٹ حالیت آک جتا ئسر۔ میرات کٹیا غان زیات مسر تو سپریم کورٹ کٹیا نا ذریعہ غاتا اَریفے، داوخت آ قطری چھٹی بس، کیلبری فونٹ آن جعل سازی پک مس، عدالت فیصلہ تس کہ نی صادق و امین افیس، کرپشن پک مس، میرات آتا سرجم مون آ بس، منی ٹریل ملیتوو سزا بنفنگا تو اوکان پد دامخلوق عدالت آتے شست کننگ نا بناءِ کریر۔ اوپارے کہ لندن نا جائیداد آتا بابت دا پوسکن ءُ انکشاف اس الوکہ، داڑآ بی بی سی نا ڈاکومینٹری جوڑ مسنے وخت اس کہ نیویارک ٹائمز اٹ آرٹیکل ہم لکھنگاولے کنا سوج ءِ کہ اگہ دا خبر غلط ئس تو دنیا ٹی گچین کانود ساڑی ئس اوڑتون رجوع انت اکن کننگتو۔ اوپارے کہ جمہوریت اٹ میڈیا تینا کاریم ءِ کیک، او ہرگڑا غا نظر تخک، میڈیا خبر مون آ بریک و اوٹی انکشاف مریک ہراڑآ مخلوق استیفہ ایتک۔ اوپارے کہ فیک اکاؤنٹ آتیا مچ آ جے آئی ٹی جوڑ مس، دا کیس ءِ عمران خان جوڑ کتویسس۔ مراد سعید پارے کہ گودی نا اولیکو وار حکومت جوڑمس، داحکومت اٹ ہراہم ڈٹ بسکہ اوٹی شریک چیئرمین ءِ مسٹر فائیو پرسںٹ نا تران ملا ہرااوکان پد ودسا ہنا۔ داتران نا ذکر ءِ دنیا نا بھلا بھلا اخبار آتا آرٹیکل آتیٹی مسنے۔ اپوزیشن کرپشن و دزی کرسا پاکستان تون اوار مچ آ دنیا ٹی میرات جوڑ کرے، شہباز شریف نا سلاہکار کک بیکس نا پیسہ غاتے وصول کریکہ، منی لانڈرنگ نا کمک اٹ اودے پیسہ مون تروک آ پیشن نا ملک تو مُر انا ہیت اسے وخت اس کراچی آ ہم انتنے۔ ملک اٹ سلاہ درشانی نا آجوئی ءِ، میڈیا غا ہچ ءُ پابندی اس اف۔ وزیراعظم عمران خان آن ہراتم جائیداد آتا بارواٹ ہریفنگا تو اواوفتا دستاویزی شاہدی تس و پک کرے کہ کٹیا حلال نا مرے تو رسید آک پیش تمرہ۔
