طورخم۔ 01 جنوری (اے پی پی) بنجائی وزیر داخلہ شیخ رشید احمد پارینے کہ طورخم بارڈر پاکستان نا زرگزران اٹ مخ انا ملی نا حیثیت تخک، بارڈر مینجمنٹ سسٹم ءِ گچین کینہ، گڑاتا کلیئرنس نا ہم پوسکن ءُ نظام اس اتنگ اُن۔ وزارت داخلہ نا کنڈآن جاری بیان نا رداٹ داخیال آتا درشانی ءِ او جمعہ نادے آ طورخم بارڈر نا دورہ ءِ کننگ نا وخت آ گپ وتران کرسا کرے۔ وزیر داخلہ پارے کہ بارڈرمینجمنٹ سسٹم اٹ جہانی آب انا رداٹ جدت اتنگ اُن، طورخم بارڈر پاکستان نا زرگزران اٹ مخ انا ملی نا حیثیت تخک۔ طورخم نا کمک اٹ نن نیامی ایشیااسکان رسینگ دوئی کننگ کینہ۔ حکومتی گام گیج آتیان مسافر آتا ہن و بر و گڑاتا کلیئرنس پین آسان مریک و غٹ بروک آ اڑاند و مشکل آک مُرمریرہ۔ اوغانستان ءِ ہم تینا دنگ اٹ مسافر و کنٹینر آتا آسراتی کن اولیتی بنداو تیا گام گیج کروئی مرے۔ اوپارے کہ وزیراعظم عمران خان نا وژن نا رداٹ طورخم بارڈر آ امپورٹ ایکسپورٹ کن گچین و پوسکن ءُ نظام اس اتنگ اُن۔ بارڈر آ مسافر و کنٹینر آتا ہن و بر کن پرائمری انسپیکشن، پسینجر ٹرمینل، امپورٹ وایکسپورٹ ٹرمینل نا کمک اٹ زوت و گچین وڑاٹ کلیئرنس مریک۔
