وزیراعظم عمران خان اپوزیشن نا پاننگ آ اسُل استیفہ تفک، وزیر خارجہ مخدوم شاہ محمود قریشی نا پارلیمنٹ ہاؤس اٹ میڈیا تون گپ وتران

اسلام آباد۔ 01 جنوری (اے پی پی) وزیر خارجہ مخدوم شاہ محمود قریشی مچ آ قوم ءِ پوسکن آ سال انا مبارکبادی ترسا پارینے کہ 31 دسمبر بس و ہنا ولے استیفہ غاک بتوس، وزیراعظم عمران خان تون الس نا مینڈیٹ ءِ ہنداخاطرآن او اپوزیشن نا پاننگ آ اسُل استیفہ تفک۔ کرک اٹ مندر ءِ نسخان تننگ نا واقعہ نا ترندی اٹ مذمت ءِ کینہ ہرافک دا حرکت ءِ کرینو اوفک پاکستان نا جہانی تشخص ءِ نسخان تسنو۔ جمعہ نادے آ پارلیمنٹ ہاؤس اٹ میڈیا تون گپ وتران کرسا وزیر خارجہ پارے کہ اینو رائیونڈ لاہور اٹی پی ڈی ایم نا سرکڑدہ غاک مچ مننگ ءُ۔ ای سمجھیوہ کہ اینو نا پی ڈی ایم نا دیوان پاکستان پیپلزپارٹی نا سی ای سی نا تدوک آ دیوان نا پک کننگ ءِ۔ پیپلزپارٹی فیصلہ کرینے کہ استیفہ تننگپک و پارلیمنٹ و سینیٹ آن لاتعلق مفننگک۔ اوپارے کہ پیپلزپارٹی سندھ انا حکومت نا قربانی ءِ تننگ خواپک۔ ہروئی ءِ داکہ انت مسلم لیگ نون ہم پیپلزپارٹی نا دا فیصلہ غاتیا راضی مسنے یا آخا۔ پی ڈی ایم نا سرکڑدہ فیصلہ کریسس کہ 31 دسمبر اسکان غٹ استیفہ غاتے پی ڈی ایم نا صدر مولانا فضل الرحمان تون جمع کرفنگے۔ وزیر خارجہ پارے کہ پیپلزپارٹی داڑآن اختلاف کرے و استیفہ غاتے تینا تینا جماعت نا سرکڑدہ ءِ جمع کرفنگ نا ہیت ءِ کرے۔ 31 دسمبر بس و ہنا ولے استیفہ غاک بتوس۔ لانگ مارچ آ ہم اتفاق اف و پیپلزپارٹی نا سرکڑدہ لاک مارچ ءِ نواز شریف نا پدی تون گنڈا۔ وزیراعظم عمران خان تون الس نا مینڈیٹ ءِ ہنداخاطرآن او اوفتا پاننگ آ اسُل استیفہ تفک۔ اوپارے کہ 27 دسمبر پاکستان نا تاریخ نا است ہسون دے ءِ انتئے کہ دادے آ گودی بے نظیر بھٹو شہید مس نن داغم اٹی شریک اُن۔ 27 دسمبر آ مریم صاحبہ لاڑکانہ غا ہنا ولے فضل الرحمان صاحب ہِنتو۔ پی ڈی ایم دیوان اٹی پیپلزپارٹی نا نمائندگی ءِ راجہ پرویز اشرف و یوسف رضاگیلانی صاحب کننگ ءُ و داہڑتوم آ شخصیت آک استیفہ غاتا حق اٹی افس۔ دیوان اٹی شرف نا قابل شخصیت آک تو اوار مسر ولے واکدار آک آخا انتئے کہ پیپلزپارٹی ٹی واکدار بیرہ آصف علی زرداری ءِ۔ قوم حقیقت ءِ جوان چاہسونے اوداسہ اوفتا ریفنگ اٹ بفک۔ احتساب آن نجات و این آر او آن بیدس قومی وڑنا باندات آ گپ وتران مننگ کیک۔ وزیر خارجہ پارے کہ کرک اٹ مندر ءِ نسخان تننگ نا واقعہ نا ترندی اٹ مذمت ءِ کینہ کنے خوشی ءِ کہ سپریم کورٹ اونا نوٹس ءِ ہلکونے، وزیراعظم عمران خان ہم ترند انگا ولز آتیٹی داواقعہ نا مذمت ءِ کرینے۔ دا اسلامی قدر آتیان چپ ءِ نن اقلیت آتا عبادت ناجاگہ غاتا رکھ ءِ پک کننگے ، ہرافک داحرکت ءِ کرینو اوفک پاکستان ناجہانی تشخص ءِ نسخان تسنو۔ اوپارے کہ این آر او، احتساب آن بچنگ نا کسر ءِ۔ فیٹف نا کانود سزی کن ہراتم اپوزیشن تون سلابت نا بناءِ کننگا تو اوفک 34 ٹکی نیب ترمیمی مسودہ ءِ پیش کریر۔ نن احتساب و انتقام نا پرخ ءِ پہہ مرینہ نن انتقام نا قائل افن ولے احتساب ءِ مون آدننگے۔ وزیر خارجہ پارے کہ جمعیت علمائے اسلام نا تہہ ٹی مولانا نا بیانیہ غان اختلاف پاش مرسا مون آ بسنے۔ اسرائیل ءِ امنا کننگ نا سیاسی شوشہ اس ہلنگا تانکہ الس نا جوزہ غاتے مون آ اتنگے ولے اوفتے بے سہبی تون مون تروئی تما۔ کشمیر و فلسطین نا ویل اتون مچ آ قوم انا جوزہ وابستہ ءِ۔ کشمیر و فلسطین نا ویل آ پاکستان نا پیدوار دوٹوک موقف ءِ۔