اسلام آباد۔ 01 جنوری (اے پی پی) چین کوویڈ۔ 19 آن پد ہم پاکستان اٹ بجلی نا فراوانی کن پاور لائن نا تفنگ نا ڈٹ ءِ برجاتخا۔ سال 2020ء ٹی دینی مرض آن ہندی زرگزران سست روی نا گواچی ءِ وخت اس کہ ہر صںعت ہم داہلوک آ مرض آن وڑانا وڑدروشم اسے ٹی زہمی مسنے ولے اوکان پد ہم چینی کاروباری ادارہ غاتا مخ تفی آن اُرائی بجلی نا سپلائی نا ڈٹ آتا تفنگ اٹ 2020ء ٹی اہم پیش رفت مس، حوال نا رداٹ پبی تیاری اتون تفنگ نا اِراسال آن پد مٹیاری آن لاہور 660 کے وی ٹرانسمیشن لائن پروجیکٹ نومبر اٹی پورو مس۔ دا ڈٹ انا 2021ء ٹی پورو مننگ نا گمان کننگاکہ ولے دا شیڈول آن اسہ سال اس مست پورو مس۔ مٹیاری آن لاہور ٹرانسمیشن لائن پروجیکٹ آ 14 مئی 2018ء ٹی دستخط کننگاسس و ہندا سال یکم دسمبر آ دانا تفنگ نا بناءِ کننگاسس۔ 4 میگاواٹ پاور تخوک آ داڈٹ سالانہ کم و ود 35 بلین کلوواٹ انا لائخی تخک و دا ڈٹ آن پاکستان نا ایچ وی ڈی سی نا بشخ اٹی تکنیکی خلا ءِ پُر کننگانے وخت اس کہ داڑآن 5000 آن 7000ہندی ملازمت ودی مس۔ سی پیک فریم ورک انا رداٹ میگا پروجیکٹ آن بیدس پاور ٹرانسمیشن نا چندی اہم ڈٹ آتیٹی ہم پیش رفت مس۔ اکتوبر 2020ء ٹی چائنہ ایکس ڈی پڑک کے الیکٹرک لمیٹڈ تون ڈی ایچ اے بی جے آئی 220 کے وی ٹرانسمیشن لائن ڈٹ انا معاہدہ غا دستخط کرے۔ ڈٹ انا رداٹ کراچی ٹی ڈی ایچ اے بی جے آئی سب اسٹیشن ءِ ملفوک آ اسہ پوسکن ءُ اوورہیڈ و انڈر گراؤنڈ کیبل لائن اس تالان کننگک۔ معاہدہ ٹی ڈیزین، سروے، سپلائی، سول انجینئرنگ، تفنگ، نتصیب، و فیلڈ ٹیسٹنگ اوار ءِ۔ 24 دسمبر آ چائنا انرجی انجینئرنگ کارپوریشن لمیٹڈ (انرجی چین) این ڈی ڈی سی اتون اے ڈی بی 404اے 500 کے وی ڈبل سرکٹ پاور ٹرانسمیشن لائن ڈٹ اکن ای پی سی معاہدہ کرے۔ پروجیکٹ ایس کے ہائیڈروپاور اسٹیشن آن نیلم جہلم اسکان 500 کے وی ٹرانسمیشن لائن ءِ، ہرانا کل مرغنی 75 کلومیٹرءِ، ہراٹی ڈبل لوپ و فوراسپیلٹ موڈ کاریم اٹ اتنگک۔ ایس کے ہائیڈرو پاور اسٹیشن آن بجلی نا فراوانی نا ڈٹ پاکستان نا بجلی نا کاختی ءِ پین مُر کیک و ہندی زرگزرانی و راجی شونداری ءِ مون آ دیک۔ پیداواری لائخی نا کمتی آن بیدس، ہیبدار ٹرانسمیشن لائن نا خرابی نا سوب آن بجلی نا زبردست بند مننگ تون مون تروئی تماسس۔ ہرا پاکستان نا تاریخ نا بدترین توانائی تنکی تیان اسٹ اس تکنگک۔ ہراڑآن دارالحکومت اسلام آباد آن بیدس غٹ صوبہ غاتیٹی چندی شار و خلق زہمی مسنو۔ حوال اٹی مستی پاننگاکہ سی پیک نا رداٹ ٹرانسمیشن سسٹم نا تفنگ اٹ، تدوک آ 5 سال اٹی اُرائی بجلی نا کاختی ءِ مُر کننگانے، و پوسکن آ دستخط مروک ڈٹ ہم آخبت اٹ پاکستان نا بجلی نا کاختی ءِ مُرکیک۔
