اسلام آباد۔ 31 دسمبر (اے پی پی) چین نیشنل ہائی وے 5 نا جوڑ جاڑ کن پاکستان ءِ 100 ملین ڈالر نا گرانٹ فراوان کیک، دارداٹ ہڑتوم آ ملک آک پنچ شنبے نادے آ وزارت اقتصادی امور اٹ معاہدہ غا دستخط کریر۔ اقتصادی امور نا بنجائی وزیر خسروبختیار و پاکستان اٹ چین نا سفیر ہم داوخت آ ساڑی ئسک۔ ڈٹ انا رداٹ این ایچ 5 نا 66 کلومیٹر آ تالان چار بشخ آتے جوڑ جاڑ کننگک ہراٹی ہالا و مورو نا بشخ آک اوار ءُ۔ اقتصادی امور نا بنجائی وزیر مخدوم خسرو بختیار داوخت آپارے کہ این ایچ 5 ڈٹ انا پوروی آن قطب سویل رابطہ غاتیٹی ودکی مریک۔ اوپارے کہ چین وپاکستان نا نیام اٹ بے مٹ تعلقداری ءِ و پاکستان این ایچ 5 جوڑ جاڑی ڈٹ اکن چین نا کنڈآن گرانٹ نا منت وار ءِ۔ اوپارے کہ پاکستان و چین چندی بشخ آتیٹی ہڑتوم آ کنڈآتا کمکاری کننگ ءُ۔ چین ملخ آتون مون تننگ کن پاکستان تون کمک کرینے۔ اوچین پاکستان اقتصادی راہداری نا حوالہ ءِ ترسا پارے کہ سی پیک چین سنگتی ٹی بنداوی اہمیت تخک۔ پاکستان اٹ چین نا سفیر داوخت آ پارے کہ ہڑتوم آ ملک آتا نیام اٹ کمکاری نا چرجوئی برجاءِ و چین پاکستان تون راجی و زرگزرانی شونداری کن کمکاری ءِ برجاتخک۔
