اسلام آباد۔ 31 دسمبر (اے پی پی) پاک۔ چین بے مٹ سنگتی نا نشانی تقدیر ءِ بدل کننگ نا حامل سی پیک ڈٹ 2020اٹی اسہ ہندن ءُ بے مٹ ءُ ڈٹ اس جوڑ مرسا مون آ بسنے ہراڑآ نئے بیرہ دنیا پاکستان اٹ سیاسی اتفاق رائے نا مشاہدہ ءِ کرے بلکن سی پیک ءِ داسہ سیاسی پارٹی تا فائدہ غاتیان ماورا ہُننگک، سی پیک نا دروشم اٹ بے مٹ سنگتی نا دا است بڈی ءِ مچ آ دنیا خاص کر ڈیہہ نا ملک آتیٹی درور ملیپک۔ سی پیک ڈٹ بھاز اہمیت تخک۔ اینخو سال اٹی حزب اقتدار و حزب اختلاف ہڑتوم آتا راہشونک سی پیک ءِ گیم چینجر و زرگزرانی انقلاب نا حامل پروجیکٹ نا حیثیت اٹ شاندار لوز آتیٹی ستاءِ کرینو۔ سی پیک مہالو آن منظرنامہ ءِ یکسر بدل کرینے، شونداری و شونہالی نا کیہی ہدف آتیا سجفنگ انگ ءِ۔ چین پاکستان اقتصادی راہداری علاقائی شونداری و شونہالی ٹی پین فعال کڑد ادا کیک۔ چین علاقائی کمکاری نا پین مون آ دننگ اٹ مصنوعات آتا واپار نا بابت گوادر بندرگاہ نا مخ تفی ءِ کیک۔ اگہ ہُننگے تو چین پاکستان اقتصادی راہداری نئے بیرہ چین وپاکستان نا الس نا فائدہ غاتیٹی ءِ، بلکن غٹ کڑدہ غاتا اسیجا کوشست آتیان دا راہداری علاقائی شونداری و شونہالی ٹی پین فعال کڑد ادا کیک۔ سی پیک ڈٹ دنیا ٹی برجا غٹ آن بھلا شونداری ڈٹ ءِ، 55 ارب ڈالر مالیت آن زیات نا پاک چین اقتصادی راہداری ڈٹ پاکستان ءِ ترند رفتار اقتصادی شونداری نا کنڈآ دیک۔ مرغن، کشادہ و رکھوک سڑک، توانائی نا ڈٹ، انڈسٹریل پارک و گوادر بندرگاہ نا ڈٹ، ہرانا پوروی پاکستان کن روشنا آخبت نا روشنائی ءِ۔ سی پیک نا گونڈ وختی ڈٹ 2017-2018وخت اس کہ مریس وختی ڈٹ 2020آن 2030ء اسکان پورو مریرہ۔ پاک چین اقتصادی راہداری ڈٹ انا بنا آن پد پاکستان نا ہندی باتی تا زند اٹ خاطر خواہ گچینی و بدلی بسنے۔
