اسلام آباد۔ 31 دسمبر (اے پی پی) نیشنل کمانڈ اینڈ آپریشن سینٹر این سی او سی قومی ویکسین حکمت عملی آ عملدرآمد نا بابت اسہ خصوصی ءُ دیوان اس اڈ ہلک۔ این سی او سی نا دیوان اٹی کورونا نا دین انا بابت گراف، حساب وکتاب و قومی ویکسین حکمت عملی آ گپ وتران کننگا۔ وزیراعظم نا سلاہکار واپار و زرکاری عبدالرزاق داؤد ویڈیو لنک انا کمک اٹ دیوان اٹی بشخ ہلک۔ وزیراعظم نا خصوصی کمکار جان جوڑی ڈاکٹر فیصل سلطان، اقتصادی امور ڈویژن نا بنجائی وزیر خسرو بختیار، نیزگاری نا چٹفنگ نا بارواٹ ایس اے پی ایم ڈاکٹر ثانیہ نشتر، چیئرمین نیشنل ڈیزاسٹر مینجمنٹ اتھارٹی(این ڈی ایم اے) لیفٹیننٹ جنرل اختر نواز ستی، سرجن جنرل پاکستان آرمی لیفٹیننٹ جنرل نگار جوہر و ڈائریکٹر جنرل ملٹری آپریشنز(ڈی جی ایم او) میجر جنرل نعمان ذکریا ئسک این سی او سی نا خصوصی دیوان اٹ بشخ ہلکر۔ قومی کوآرڈینیٹر این سی او سی جنرل حمودالزمان این سی او سی نا فیصلہ نا رداٹ قومی ویکسین نا حکمت عملی نا بارواٹ فورم ءِ اپ ڈیٹ کرے۔ ڈی جی این سی او سی میجر جنرل آصف گوریا فورم ءِ سرجمی اٹ پارے کہ ویکسین نا فراوانی کن فیڈریٹنگ یونٹ آتا آسراتی کن غٹ کوشست آتے کننگک۔ فورمءِ پاننگاکہ حکمت عملی نا رداٹ اولیکو ریسہ ٹی محکمہ جان جوڑی نا فرنٹ لائن باسک و 65 سال آن زیات وئی انا بندغ آتے کوویڈ۔ 19 ویکسین فراوان کننگک۔ بروک آ ریسہ ٹی محکمہ جان جوڑی نا ایلو غٹ باسک و ہمو بندغ آتے ویکسینیشن کننگک ہرافتا وئی 60 آن 64 سال انا نیام اٹی ءِ۔ فورم ءِ پاننگاکہ سال انا اولیکو سہ ماہی اسکان محکمہ جان جوڑی نا غٹ فرنٹ لائن باسک آتا ویکسینیشن کننگک۔ حوال اٹی پاننگاکہ این سی او سی نا کمک اٹ نیشنل انفارمیشن ٹیکنالوجی بورڈ(این آئی ٹی بی) نا شریداری اٹ اسہ خصوصی آن لائن نیشنل امیونائزیشن مینجمنٹ سسٹم (این آئی ایم ایس) اس تیار کننگانے ہرا مچ آ ویکسینیشن نا عمل نا مرکز نا کڑد ادا کیک۔ فورم ءِ پاننگاکہ ویکسین ایڈمنسٹریشن سیل غٹ ڈسٹرکٹ اینڈ تحصیل ہیڈکوارٹر ہسپتال و ریجنل ہیلتھ سینٹر آتیٹی جوڑ کننگک تانکہ ویکسینیشن نا عمل ءِ شیفکو کہیول اسکان سرکننگ مرے۔ داٹی پین پاننگانے کہ ماسٹر ٹرینرآتے تربیت تننگک ہرا ٹیکہ خلنگ نا عمل کن جان جوڑی نا بابت کارندہ غاتا تربیت نا بناءِ کیک۔ تربیتی عمل بنجائی دارالحکومت و صوبائی کہول آ بناکیک و ماسٹر ٹرینرز ویکسینیشن کن محکمہ جان جوڑی نا کارندہ غاتے پین تربیت ایتنہ۔
