پشاور۔ 31 دسمبر (اے پی پی) بنجائی وزیر داخلہ شیخ رشید احمد فرنٹیئر کانسٹیبلری ایف سی نا خذمت آتے خراج تحسین پیش کرسا پارے کہ ایف سی دہشت گردی نا برخلاف جنگ اٹ ہراول دستہ نا کڑد ءِادا کرے، پنچ شنبے نادے آ داڑے ایف سی ہیڈکوارٹر آ بننگ آ ورناتا چاق و چوبند دستہ بنجائی وزیر داخلہ ءِ سلامی پیش کریر۔ بنجائی وزیر داخلہ ایف سی ہیڈکوارٹر اٹی یات گار شہداء آ پھل تخا و شہید آتا درجہ غاتا بڑزی کن دعا کرے۔ فرنٹیئر کانسٹیبلری نا بابت کمانڈنٹ معظم جا انصاری وزیر داخلہ ءِ حوال تس۔ وزیر داخلہ پارے کہ ایف سی نا قربانی تے قوم قدر انا نظراٹ ہرک۔ کچ اٹنگا وسیلہ غاتیٹی امن و ایمنی کن ایف سی نا قربانی و خذمت ستاکڑزک۔ اوپارے کہ ایف سی شہداء پیکج اٹ ہم ودکی کننگک و مون تروک ویل آتے اولیتی بنداو آ ایسر کینہ تینا دتر اٹ امن نا چراغ ءِ لگفوک آ شہید آتا یات قوم انا است آتیٹی مدام زندہ سلک۔ اوپارے کہ یک و نیم تُو اٹی فرنٹیئر کانسٹیبلری نا ویل آتے ایسر کینہ۔ اوپارے کہ ایف سی نا نڈر ورناک دہشت گردآتے چٹفنگ کن ہراول دستہ نا کڑد ءِ ادا کرینو۔ کمانڈنٹ ایف سی معظم جاہ انصاری پارے کہ وزیر داخلہ نا بننگ آن ایف سی ورناتا حوصلہ پین بڑز مسنے۔ اوپارے کہ سندھ اٹی زندان و فارن دفترآتا سیکورٹی نا خذمت ءِ ہم ایف سی انجام تننگ ءِ۔ تدوک آ اِراسال اٹی ایف سی نا 11 ورنا جان تا نذرانہ پیش کریر وخت اس کہ 27 دہشت گرد آتے جہنم نا گواچی کریر۔ اوپارے کہ سیکشن تھری نا رداٹ ایف سی بارڈر و ایب وکیبی علاقہ غاتا سیکورٹی تون اوار اقتصادی راہداری، گلگت بلتستان، خیبرپختونخوا، واپڈا، سوئی گیس، این ایچ اے تون اوار اقوام متحدہ ٹی ایف سی نا آخبتی نمائندگی ساڑی ءِ۔
