اسلام آباد۔ 31 دسمبر (اے پی پی) وزیر خارجہ مخدوم شاہ محمود قریشی پارینے کہ پاکستان، جاپان تون تینا ہڑتوم آ کنڈآتا تعلقداری تے بھاز قدر انا نظراٹ ہرک، پاکستان، جاپانی زرکار آتے پاکستان اٹ زرکاری کن ہروڑنا آسراتی فراوان کیک۔ داہیت ءِ او پاکستان اٹ تعینات جاپانی سفیر کنینوری مستودا تون گپ وتران کرسا پارے ہرا پنچ شنبے نادے آ وزارت خارجہ ٹی اوڑتون اوڑدہی کرے۔ گپ وتران اٹی ہڑتوم آ کنڈآتا تعلقداری، کورونا نا دینی حالیت آتون اوار تین پہ تینی است خواہی نا باندات آ گپ وتران مس۔ وزیر خارجہ پارے کہ پاکستان، جاپان تون تینا ہڑتوم آ کنڈآتا تعلقداری تے بھاز قدر انا نظراٹ ہرک۔ وزیر خارجہ تینا دورہ جاپان اٹی جاپانی وزیراعظم، وزیر خارجہ و ایلو سرکڑدہ غاتون مروک آ خوشگوار اوڑدہی تا ذکر ءِ کرے وپارے کہ ننے خوشی ءِ کہ پاکستان و جاپان نا نیام اٹ سفارتی تعلقداری نا ہفتاد سال پورو مننگ والا ءُ۔ کورونا دین اٹی، جاپان نا کنڈآن تروک آ کمکاری آ جاپانی حکومت و سرکڑدہ غاتا منت وار اُن مخدوم شاہ محمود قریشی پارے کہ پاکستان و جاپان نا نیام اٹ کشت وکشار، صنعت و حرفت، کم نہاد اُراتا تفنگ و ماحولیاتی رکھ اتون اوار بھاز انگا بشخ آتیٹی ہڑتوم آ کنڈآتا کمکاری ءِ مون آ دننگ نا بھلو وارخواہی اس ساڑی ارے ہرافتے کاریم اٹ اتسا ہڑتوم آ کنڈآتا اقتصادی کمکاری ءِ پین مون آ دننگ مریک۔ وزیر خارجہ پاکستان و جاپان نا نیام اٹ بڑزکو کہولی رابطہ غاتا مون آ دننگ نا گرج آ زور شاغا و پارے کہ پاکستان، سیل و سوات نا مون آ دننگ کن تینا کوشست آتے کاریم اٹ اتنگ ءِ۔ پاکستان اٹ بدھ مت نا اہم مذہبی ہند آتیا حاضری کن بروک آ جاپانی سیل و سواتی تے است انا حب اٹ بخیر اٹ پانہ۔ جاپانی سفیر اوغانستان اٹی قیام امن تون اوار ڈیہہ ٹی امن و سوگوی کن پاکستان نا کنڈآن کروک آ کوشست آتا ستاءِ کرسا، پاکستان و جاپان نا نیام اٹ، چندی بشخ آتیٹی ہڑتوم آ کنڈآتا کمکاری ءِ ودفنگ کن تینا کوشست آتے برجاتخنگ نا عزم انا درشانی ءِ کرے۔
