اسلام آباد۔ 31 دسمبر (اے پی پی) وزیراعظم عمران خان نا کماشی ٹی اولیتی بشخ آتا ہفتہ وار جاچ دیوان تا بنامس۔ پنچ شنبے نادے آ جاری بیان نا رداٹ وزیراعظم نا کماشی ٹی دیوان اٹی خصوصی کمکار ڈاکٹر معید یوسف تعلقدار وزارت آتا سیکرٹری و بڑزکو آفیسر آک بشخ ہلکر۔ داکان بیدس ہر چار آ صوبہ غاتا چیف سیکرٹریک ویڈیو لنک انا کمک اٹ دیوان اٹی بشخ ہلکر۔ وزیراعظم نا پارت آتیا مستین گوجالنگوک آ شش بشخ آتیٹی بھلو کچ اسے آ اصلاحات نافذ کننگ کن اوفتے اولیتی بشخ آتا درجہ تننگا ہرافتے ٹی فوڈ سیکورٹی، کشت وکشار، بجلی، افرادی قوت، پیشن نا زرکاری، نجکاری، انفارمیشن ٹیکنالوجی و برآمد آتیا خصوصی چکار کن اکنامک آؤٹ ریچ اوار ءِ۔ داچرجوئی ٹی وزیراعظم نا کماشی ٹی ہفتہ وار جاچ دیوان مریک ہراٹی وزیراعظم تینٹ دا بشخ آتا بابت ویل آتا دمدستی ایسری نا چاروکی ءِ کیک۔ دا دیوان تیٹی ہر بشخ آخاص چکار کرسا وزیراعظم ءِ پیش رفت آ جتا جتا حوال تننگک۔ پنچ شنبےنادے آ اڈ ہلوک دیوان اٹی وزیراعظم نیشنل سیکورٹی ڈویژن تا کنڈآن تیار کروک آن لائن ایگری ڈیش بورڈ انا منظوری ءِ تس ہرا کنوئی آ گڑاتا نہاد و دستیابی نا قومی، صوبائی و ضلعی کہول آ چاروکی ءِ کیک۔ ڈیش بورڈ نئے بیرہ پک مروک ٹک آتا کمک اٹ ہروڑنا تنکی آن بچنگ اٹ کلیدی کڑد ادا کیک بلکن کوڑی کننگ و منافع خوری ءِ توننگ اٹ ہم بھاز گچین جوڑمریک۔ وزیراعظم داوخت آ پیدوار پارت کرے کہ نُت، بورہ و دال کون آ گڑاہراکہ ہر نیزگار اُراکن بھاز اہم ءُ اوفتا نہاد آتا ودنگ ءِ توننگ کن ہروڑنا گام گیج ہرفنگ آن پاناد کننگپ۔ داکان بیدس برآمد آتے ودفنگ، درآمد آتیکن ہندی گیگ بدل پٹنگ کن گام گیج کننگے تانکہ کرنٹ اکاؤنٹ سرپلس ءِ پین ودفنگے و زرمبادلہ نا کوڑی آ دباؤمف۔
