اسلام آباد۔ 30 دسمبر (اے پی پی) وزیراعظم عمران خان پارت کرینے کہ اُرائی صارف آتیکن ریلیف و صنعت آتے بے سلنگ آن و اڑزآن بجلی نا فراوانی ءِ حکومتی اولیت آتیٹی سرفہرست تخنگے و توانائی نا بشخ اٹی آخبت نا گرج آتے مون آ تخسا دیرپا اصلاحات کننگے۔ داخیال آتا درشانی ءِ او چارشنبے نادے آ تینا کماشی ٹی توانائی بشخ انا جاچ دیوان آن تران کرسا کرے۔ دیوان اٹی بنجائی وزیر عمرایوب، مخدوم خسرو بختیار، ڈاکٹر عبدالحفیظ شیخ،حماد اظہر، خصوصی کمکار تابش گوہر، ندیم بابر، وقار مسعودو تعلقدار بڑزکو آفیسر آک بشخ ہلکر۔ دیوان اٹی وزیراعظم ءِ توانائی نا بشخ انا بابت حوال تننگا۔ بجلی نا پیدوار و فراوانی نا گچینی و انرجی مکس ءِ گچین و ماحول دوست جوڑ کننگ تون اوار اوار اڑزآن بجلی جوڑ کننگ نا سلاہ ئی ڈٹ آتیا ہم سرجم گپ وتران مس۔ داکان بیدس جاری ڈٹ آتیا پیش رفت آن ہم دیوان ءِ معلومدار کننگا۔ وزیراعظم ءِ تدوک آ حکومت آتا کنڈآن کروک آ معاہدہ و اوفتا زرگزران و لس بندغ آ منفی اثرآتیان ہم معلومدار کننگا۔ وزیراعظم ءِ حکومت نا کنڈآن کورونا نا دین آن پد ہم صنعت و لس بندغ نا ریلیف کن کروک آ گام گیج آتا بارواٹ ہم پاننگا۔ وزیراعظم توانائی نا بشخ انا اصلاحات آ است جمی نا درشانی ءِ کرسا اُرائی صارف آتا ریلیف و صنعت آتے بے سلنگ آن و اڑزآن بجلی نا فراوانی ءِ حکومت نا اولیت آتیٹی سرفہرست تخنگ نا پارت کرے۔ وزیراعظم اصلاحات آتے دیرپا و اوفتے ٹی آخبت نا گرج آتے مون آ تخنگ آ ہم زور شاغا۔
