اسلام آباد۔ 30 دسمبر (اے پی پی) پاکستان و جبوتی واپار، دودوربیدہ و دفاع نا بشخ آتیٹی ہڑتوم آ کنڈآتا کمکاری ءِ پین سوگو کننگ نا عزم انا درشانی ءِ کرینو۔ دا عزم انا درشانی ءِ چارشنبے نادے آ صدر مملکت ڈاکٹر عارف علوی تون جبوتی پارلیمنٹ نا صدر و افریقی یونین پارلیمنٹ نا قائم مقام چیئرمین محمد علی حمید نا کماشی ٹی ڈل انا ایوان صدر اٹی اوڑدہی ٹی کننگا۔ ایوان صدر آن جاری اعلامیہ نا رداٹ صدر مملکت ڈاکٹر عارف علوی پارے کہ پاکستان جبوتی ٹی تینا سفارتخانہ ءِ ملنگ و ایلو افریقی ملک آتیٹی سفارتی مشن تا قیام نا فیصلہ ءِ کرینے، جبوتی بندرگاہ غا پاکستانی گڑاتا زوت کلیئرنس کن حکومت جبوتی نا کمک درکار ءِ۔ صدر مملکت بھارتی مقبوضہ کشمیر اٹ مسلم آبادی نا برخلاف بھارتی ظلم و انسانی حق انا لتاڑتے ہم مون آ تخا۔ صدر پارے کہ جہانی برادری اسیجاخواست آتا رداٹ کشمیر اٹ انسانی حق انا لتاڑ تے توننگ و کشمیری تے اوفتا حق خودارادیت نا فراوانی کن زور شاغے۔ جبوتی پارلیمنٹ نا صدر پارے کہ جبوتی پاکستان تون دودوربیدہ، واپار و دفاع تون اوار ہر بشخ اٹ ہڑتوم آ کنڈآتا کمکاری ءِ ودفنگ نا خواہندارءِ۔ گوادر و جبوتی بندرگاہ تیان ہڑتوم آ برادر ملک آتا نیام اٹ واپار ءِ مون آ دننگ اٹ کمک رسینگک۔ کڑدہ غاک دا ہیت آ امنا کریر کہ پارلیمانی، دودوربیدہ ئی و دفاعی ڈل آتا ہن و بر آن ہڑتوم آ ملک آتے پین خڑک اتنگ اٹ کمک رسینگک۔
