اسلام آباد۔ 30 دسمبر (اے پی پی) اسپیکر قومی اسمبلی اسد قیصر تون چارشنبے نادے آ اوغانستان نا وزیر واپار و صنعت ناصر احمد غوریانی اوڑدہی کرے۔ ہراٹی ہڑتوم آ کنڈآتا واپار نا مون آ دننگ تون اوار تین پہ تینی است خواہی نا ایلو اہم باندات آ گپ وتران کننگا۔ اسپیکر دا وخت آ گپ وتران کرسا پارے کہ پاکستان اوغانستان تون تینا دیرینہ برادرانہ و دوستانہ تعلقداری تے بھاز قدر انا نظر اٹ ہرک۔ ساڑی پارلیمنٹ اوغانستان تون ہڑتوم آ کنڈآتا کمکاری و واپاری کچ اٹ ودکی کن اولیتی بنداو تیا گام گیج کننگ ءِ۔ سی پیک ڈٹ ڈیہہ نا شونداری و شونہالی نا ڈٹ ءِ، و اوغانستان دا ڈٹ انا سوب آن ڈیہہ نا ایلو ملک آتون واپار نا گیٹ وے جوڑ مریک۔ سی پیک نا رداٹ نیامی ایشیائی ملک آتسکان واپاری کچ ءِ ودفنگ کن اوغانستان نا کڑد بھاز اہمیت تخک۔ اوغان صنعت کار و پوریاگر تا رشکئی اقتصادی زون اٹ اوار مننگ آن پاک۔ اوغان واپاری کچ اٹ ودکی مریک۔ پاکستانی و اوغانی مصنوعات آتا نیامی ایشیائی ملک آتسکان رسینگ آن ہڑتوم آ ملک آتیٹی زرگزرانی شونداری اس بریک۔ اسپیکر قومی اسمبلی پارے کہ پاکستان و اوغانستان نا نیام اٹ اولیتی واپاری معاہدہ و اوغان ٹرانزٹ ٹریڈ معاہدہ غان ہڑتوم آ ملک آتا نیام اٹ واپار و زرکاری نا پوسکن آ دور بناکیک۔ اوغانستان نا وزیر واپار و صنعت ناصر احمد غوریانی اسپیکر قومی اسمبلی نا اوغانستان و پاکستان نا واپار و زرکاری نا مون آ دننگ کن کروک آ گام گیج آتا ستاءِ کرے و پارے کہ پاکستان و اوغانستان نا نیام اٹ دیرینہ دوستانہ تعلقداری ٹی اسہ پوسکن ءُ دور اسے نا بنامننگ والا ءِ۔ اوغان امن معاہدہ طے مننگ اٹ پاکستان نا کڑد ستاکڑزک۔ اوغانستان اٹی دیرپاامن کن پاکستان نا کمک المی ءِ، اوغان وزیر پارے کہ پاکستان و اوغانستان نا نیام اٹ واپاری و زرکاری نا بشخ اٹ ودکی وخت انا اہم ءُ گرج اسے۔ اوغانستان و پاکستان نا نیام اٹ واپار و زرکاری نا مون آدننگ کن پاکستانی پارلیمان نا کڑد ستاکڑزک۔ اوغانستان پاکستان نا صنعتی بشخ آن فائدہ ہرفنگ ناخواہندار ءِ۔ پاک۔ اوغان اولیتی واپاری معاہدہ و اوغان ٹرانزٹ ٹریڈ معاہدہ غا 80 درسد پیش رفت مسنے و زوت دستخط مریک۔ اوغان حکومت پاکستانی پوریاگر تے ہروڑنا آسراتی فراوان کیک۔ تین پہ تینی واپاری سرجزآتیٹی ودکی آن ہڑتوم آ ملک آتا الس شونہال مریک۔ نن اسپیکر قومی اسمبلی نا دورہ اوغانستان نا چاری اُن۔
