اسلام آباد۔ 30 دسمبر (اے پی پی) وزیر خارجہ مخدوم شاہ محمود قریشی پارینے کہ اپوزیشن نا بیانیہ تضاد آتا مجموعہ ءِ، پیپلزپارٹی درا ہرا فیصلہ غاتے کرے اوڑآن پی ڈی ایم ٹکر ٹکر مسنے، پیپلزپارٹی ٹی فیصلہ غاتا اختیار آصف علی زرداری تون ءِ و او فیصلہ ءِ بنفینے۔ بلاول بیرہ نشان تننگ کن ءِ۔ چارشنبے نادے آ تینا اسہ اہم ءُ بیان اسے ٹی وزیر خارجہ پارے کہ پیپلزپارٹی نا سینٹرل ایگزیکٹو کمیٹی نا دیوان پیدوار کرے کہ اونا و پی ڈی ایم نا کسر آک جتا جتا ءُ۔ اینو پی ایم ایل این و جمعیت علمائے اسلام اٹ پیدوار اختلاف وخت اس کہ پیپلزپارٹی نا انکار مون آ بس۔ پیپلزپارٹی پی ڈی ایم نا بیانیہ ءِ بے پڑدہ کرینے۔ اوفیصلہ کرے کہ او سینیٹ نا گچین کاری تیٹی بشخ ہلیک و ضمنی گچین کاری تیٹی ہم بشخ ہلیک و اودے حق ارے کہ او ضرور ہلے ولے دا استیفہ غاتا رٹ ءِ ہلر۔ قوم اتون مسخرہ کپس۔ وزیر خارجہ پارے کہ داسہ اوفتا بیانیہ بدل مسنے دا مہالو استیفہ تسرہ داسہ ہلنگ نا ہیت ءِ کننگ ءُ۔ وزیراعظم عمران خان اوفتا پاننگ آ اسل استیفہ تفک۔ اسل حقیقت دادے کہ پیپپلزپارٹی سندھ حکومت نا قربانی ءِ تننگ کن تیار اف۔ دا اسل استیفہ تفسہ۔ اگہ دا استیفہ تننگ نا بابت سنجیدہ ءُ تو ولدا ضمنی گچین کاری تیٹی بشخ ہلنگ نا است خواہی نا درشانیءِ اسل کتورہ۔ شاہ محمود قریشی پارے کہ پیپلزپارٹی لانگ مارچ ءِ نواز شریف نا پدی بننگ تون گنڈانے یعنی دا نئے استیفہ غاتا معاملہ غاتیٹی سنجیدہ ءُ و نئے لانگ مارچ اٹ است خواہی تخرہ۔ پی ایم ایل این نا تہہ ٹی ہم پیدوار تضاد ءِ اسہ سوچ شہباز شریف صاحب نا ءِ ہرا مذاکرات نا مخ تف ءِ ولے مذاکرات ءِ تینا رہائی تون گنڈنگ ءِ وخت اس کہ ارٹ میکو دھڑ مذاکرات نا مخالف ءِ۔ اوپارے کہ خواجہ ءِ حکومت دزگیر کتنے و نئے حکومت نا پاننگ آ مسنے ، دادزگیری ءِ نیب کرینے ہراکہ اسہ وتواجہ ادارہ اسے۔ اوپارے کہ پی ڈی ایم اٹ جتا خیال انا بندغ این آر او ہلنگ و مقدمہ غاتیان خلاصی کن اسہ جاگہ غا مچ ءُ، او مہالو آن پارینٹ کہ پی ڈی ایم نا سیوت غیرفطری ءِ ہنداخاطرآن دا چلینگ نا اف۔
