آئی ایم ایف نا کورونا دین انا جہانی دین اتون مون تننگ کن پاکستان نا گام گیج آتا ستاء

اسلام آباد۔ 30 دسمبر (اے پی پی) جہانی مالیاتی فنڈ آئی ایم ایف کورونا نا دین انا جہانی دین اتون مون تننگ کن پاکستان نا گام گیج آتا ستاءِ کرسا پارینے کہ مالی سال 2021 اٹی پاکستان نا زرگزران نا مرحلہ وار بحالی گمانی ءِ۔ داہیت ءِ جہانی مالیاتی فنڈ انا پالیسی ٹریکر پنی ءُ حوال اسے ٹی پاننگانے، دا حوال اٹی پاکستان اٹ کورونا دین انا اولیکو ناجوڑ آن ہلیس داتم اسکان نا حالیت، دین اتون مون تننگ کن حکومت نا کنڈآن کروک آ گام گیج و آخبت نا حالیت آتا سرجم عکاسی ءِ کننگانے۔ حوال نارداٹ جون 2020اٹی پاکستان اٹ دین انا تالانی نا ہڑدے ئی کچ 6 ہزار کیس آتا بڑزکو انگا کہول آ ئس۔ پاکستان نا بنجائی و صوبائی حکومت آک دین انا تالانی ءِ توننگ کن غٹ المی گام گیج آتے کریر ہراٹی جولائی آن پوسکن آ کیس آتا کچ اٹی کمتی بننگ بناکرے و اگست و ستمبر اٹ ہڑدے ئی کیس آتا کچ اسہ ہزار آن کم مس۔ حوال نا رداٹ نومبر نا نیام اٹ کورونا نا مثبت کیس آتا کچ اٹ ودکی نارجحان بناکرے ہراداتم اسکان برجاءِ، کوویڈ۔ 19 نا دا دھچکہ غاک ملکی زرگزران ءِ زہمی کرینو۔ مالی سال 2020اکن پاکستان نا اقتصادی ودیکی نا کساس منفی 0.4 درسد خلنگاسس، مالی سال 2021اٹی پاکستان نا زرگزران نا مرحلہ وار بحالی نا کنڈآ ہِننگ نا گمان ءِ۔ حوال اٹ پاننگانے کہ اپریل نا نیام اٹ بنجائی حکومت صوبہ غاتا سلابت و کمک اٹ لاک ڈاؤن اٹ نرمی کن بست وبند کرے۔ تیرمہ نا ایسر اسکان پابندی تیٹی پین نرمی کننگا، تعلیمی ادارہ، سیل و سواتی ہند، ریسٹورنٹ، مالز، ریٹیل آوٹ لیٹس و کاروبار ءِ آب اٹنگا رکھی وڑوڈول آتا رداٹ ملنگا۔ رکھی ماسک بیننگ ءِ المی گوندنگا، کورونا نا دین انا ارٹ میکو ریسہ کن پاکستان نا حکومت گام گیج کرینے ہرافتے ٹی سمارٹ لاک ڈاؤن نا نفاذ، السی مچی تیا پابندی، سیمینار و تھیٹر کون آ ہند و تعلیمی ادارہ غاتا بندش اوار ءِ۔ رپورٹ اٹ پاننگانے کہ پاکستان نا حکومت معمر بندغ و فرنٹ لائن طبی عملہ ءِ دین اتون مون تننگ کن ویکسین نا فراوانی نا ڈٹ اس جوڑ کرینے،پاکستان ودکی ویکسین نا فراوانی کن تیار کنندگان و جہانی بینک و ایشیائی شونداری بینک کون آ ادارہ غاتون ہم رابطہ ٹی ءِ، پاکستان دارداٹ 250 ملین ڈالر نا زرہم جتا کرینے۔ حوال نا رداٹ پاکستان اٹ کورونا دین انا ویکسین نا فراوانی سال 2020 انا ارٹ میکو سہ ماہہی ٹی گمانی ءِ، جہانی مالیاتی فنڈ انا رپورٹ اٹ کورونا دین انا جہانی دین اتون مون تننگ کن پاکستان ناحکومت نا کنڈآن مالیاتی،زری و میکروفنانشل گام گیج آتا سرجمی اٹ احاطہ ءِ کننگانے۔ رپورٹ نا رداٹ پاکستان نا حکومت راج انا نیزگار و نزور تپہ غاتے دین انا اثر آتیان بچفنگ و زرگزران نا پہیہ ءِ چلیفنگ کن 24 مارچ آ 1240 ارب روپئی نا کمکی پیکج اس جاری کرے ہراڑآ پورو عملدرآمد کننگ انگ ءِ۔