سینیٹر کلثوم پروین زیرک ءُ سیاستدان اس ئس، بنجائی وزیر حوالکاری و شینکاری سینیٹر شبلی فراز نا سینیٹ اٹ ہڑزخواہی ریفرنس آن تران

اسلام آباد۔ 30 دسمبر (اے پی پی) بنجائی وزیر حوالکاری و شینکاری سینیٹر شبلی فراز پارینے کہ سینیٹر کلثوم پروین مسہ وار دا ایوان نا باسک گچین مس، اونا کزیت آ بھاز است ہسون مس، ہر اسٹ ءِ مرک انا چس ءِ کنوئی ءِ، اسل گڑا ننا عمل آک ءُ، ننے تینا عمل آتون رخصت مروئی ءِ۔ داخیال آتا درشانی ءِ او چارشنبے نادے آ ایوان بالا ٹی سینیٹر کلثوم پروین نا کزیت آ ہڑزخواہی ریفرنس آن تران کرسا کرے۔ سینیٹر شبلی فراز پارے کہ دا ننکن یات دہاںی اسے کہ نن دا ایوان اٹ مرسا تینا ملک و الس نا خذمت کن تینے وقف کروئی ءِ۔ اوپارے کہ کورونا نا دین انا سوب آن ملک ءِ مشکل حالیت مون تروک ءِ، بے سروسامانی آن پد ہم نن مشکل آتا مقابلہ ءِ کرین، ننا زرگزران ایلو ملک آتا نسبت گچین ءِ، داٹی ننا حکومت نا حکمت عملی ہم اوار ئس۔ اوپارے کہ سینیٹر کلثوم پروین دا ایوان نا مُر ہروک ءُ زالبول باسک اس ئس، دنیا نا معاملہ غاتیان شناسا زالبول و زیرک ءُ سیاستدان اس ئس۔ اوبلوچستان آن تینا سیاسی کیریئر نا بناءِ کرے ہرا بھلو حداسکان سفت نا قابل ءِ۔ اوایماندار نا درجہ غاتا بڑزی و خاہوت کن صبر انا دعا کرسا پارے کہ اللہ تعالیٰ اونا بخشش ءِ کے و ہڑتوم آ جہان تیٹی بڑزکو ہند اس عطاء کے۔