اسلام آباد۔ 30 دسمبر (اے پی پی) کورونا دین انا ارٹ میکو ریسہ غان پدہم بینکاری بشخ آن وام تا ہلنگ اٹ ودکی مسنے۔ اسٹیٹ بینک آف پاکستان نا حوال نا رداٹ نومبر 2020ء ٹی نجی بشخ ءِ وام تا جاری کننگ اٹ 2 درسد ودکی مسنے و وام تا فراوانی 121.30ارب روپئی اسکان ودا۔ حوال نا رداٹ 30 نومبر 2020اسکان بشخ انا جم واجب الادا زر 6.24 کھرب روپئی ریکارڈ کننگانے وخت اس کہ نومبر 2019نا ایسر آ نجی بشخ انا ذمہ واجب الادا وام تا کچ 6.12کھرب روپئی ریکارڈ کننگاسس۔ ایس بی پی نا رداٹ اینخو مالی سال اٹ کورونا دین انا ارٹ میکو ریسہ غان پدہم نئے بیرہ روایتی بلکن غیر روایتی بشخ آتا کنڈآن وام تا ہلنگ اٹ ودکی مسنے و بڑزکو تعلیم و جان جوڑی نا بشخ آتے وام تا فراوانی ٹی ودکی مسنے۔ داکان بیدس ایلو روایتی بشخ جاٹ بشمول تعمیرات، ٹیکسٹائل، دوائی جوڑ کننگ، تیل و گیس انا پٹنگ، ریفائنریز، انفارمیشن و کمیونیکیشن نا بشخ آتے وام تا جاری کننگ اٹ ودکی ریکارڈ کننگانے۔ ہنداوڑ پرسنل و کنزیومر فنانسنگ ہم ودانے۔ ہنداوڑ کشت وکشارو خور،ٹائرز اینڈ ٹیوب، الیکٹریکل و کمپیوٹر مینو فیکچرنگ و کیمیکلز پروڈکشن نا بشخ آتے وام تا فراوانی ہم ودانے۔
