اسلام آباد۔ 29 دسمبر(اے پی پی) وزیر خارجہ مخدوم شاہ محمود قریشی پارینے کہ پی ڈی ایم نا برانز، لانگ مارچ و جلسہ غاتیان دا حکومت ہچ ءُ جاگہ اس ہِنپک۔ اسرائیل ءِ امنا کننگ نا بابت ننے آ ہچ وڑنا زور اس اف۔ سعودی عرب نا اسہ بھاز بھلو ڈل اس زوت پاکستان آ بننگ ءِ۔ سے شنبے نادے آ تینا اسہ بیان اسے ٹی وزیر خارجہ پارے کہ پی ڈی ایم نا برانز، لانگ مارچ و جلسہ غاتیان داحکومت ہچ ءُ جاگہ اس ہِنپک، اوفتا 31 جنوری نا ڈیڈلائن نا ہم ہمو حال مریک ہراکہ 31 دسمبر نا ڈیڈلائن نا مس۔ 31 دسمبر آ اوفتا استیفہ غاتے بروئی ئس؟۔ اوپارے کہ وزیراعظم عمران خان ءِ الس نا پت دوئی ءِ او پی ڈی ایم نا پاننگ آ انت کن استیفہ مریک؟ ای پی ڈی ایم ءِ اینو پاننگ اُٹ کہ وزیراعظم عمران خان 31 جنوری آ استیفہ تفک او 31 جنوری نا انتظار ءِ انت اکن کیرہ اوفتے انت کہ فیصلہ اس کروئی ءِ داسہ کیر۔ وزیر خارجہ پارے کہ پی ڈی ایم، کراچی ٹی اسرائیل نامنظور ریلی اس کشنگ والاءُ۔ سجفنگ نا ہیت دادے کہ اوفتے دانا گرج انت اکن پیش بس۔ اسل اٹ اپوزیشن الس ءِ دھوکہ تننگ ءِ۔ اسرائیل نا بابت ننا موقف پیدوار و دوٹوک ءِ اوڑآ نن دروہم سلوک اسُن و اینو ہم سلوک اُن و داسہ تواسرائیل ہم وضاحت کرینے، چنانچہ اپوزیشن حکومت آ زور شاغنگ کن ہرا بیانیہ ءِ جوڑ کریسس او دم تسنے۔ وزیر خارجہ پارے کہ وزیراعظم عمران خان نا بیان، کنا بیان و وزارت خارجہ نا اسٹیٹمنٹ ریکارڈ آ ساڑی ءُ، داٹی مون آ بروک آ، مولانا اجمل قادری نا بیان تہلکہ خیزو وضاحت طلب ءِ نون لیگ نا سرکڑدہ غاتے پاروئی مریک کہ مولانا اجمل قادری ہراایجنڈا غا و انت کلہو اس ہلسا اسرائیل آ ہنا؟ اسرائیل ءِ امنا کننگ نا بابت ننے آ ہچ وڑنا زور اس اف۔ وزیر خارجہ پارے کہ پاکستان و سعودی عرب نا نیام اٹ تاریخی برادرانہ تعلقداری ءِ۔ سعودی عرب نیامے ڈیکلریشن اٹ پاش آن پاش پاکستان تون تفے۔ اوپارے کہ سعودی عرب نا اسہ بھاز بھلو ڈل اس زوت پاکستان آ بننگ ءِ ہراٹی اونا وزیر خارجہ تون اوار اہم شخصیت آک اوار مریرہ دا غٹ داہیت ءِ پک کیک کہ ننا سعودی عرب تون ہڑتوم آ کنڈآتا تعلقداری پین سوگو مننگ ءِ۔ ای تدوک آ دے تیٹی، شاہدی آ مبنی ڈوزیئر نا کمک اٹ جہانی برادری آ پیدوار کریٹ کہ بھارت تینا تہہ نا ناگفتہ بہ حالیت آتیان جہانی چکار ءِ اسہ کنڈ کننگ کن فالس فلیگ آپریشن کون آ راگ اس کننگ کیک۔ اوپارے کہ ہندوستان، دہشت گرد آتا تربیت و کالعدم تنظیم تا کمک ءِ کننگ ءِ، ہندوستان، پاکستان نا برخلاف تینا گل زمین ءِ کاریم اٹ اتنگ ءِ۔ وزیر خارجہ پارے کہ ’’ای۔یو، ڈس انفولیب‘‘ بھارت نا گندہ انگا عزم ءِ پین بے نقاب کرینے۔
