اسلام آباد۔ 29 دسمبر (اے پی پی) پاکستان اٹ چین نا سفیر نونگ رونگ سے شنبے نادے آاسپیکر قومی اسمبلی اسد قیصر تون اوڑدہی کرے ہراٹی ہڑتوم آ کنڈآتا تعلقداری، اہم علاقائی و جہانی باندات و تین پہ تینی است خواہی نا ایلو باندات آ گپ وتران کننگا۔ اسپیکر چینی سفیر تون گپ وتران کرسا پارے کہ پاکستان و چین نا نیام اٹ یکتا وڑنا دوستانہ تعلقداری دنیا کن اسہ درور اسے۔ ہڑتوم آ سنگت ملک آتیٹی تعلقداری تین پہ تینی شرف، فائدہ و اسٹریٹجک شریداری آ استوار ءِ۔ ہڑتوم آ سنگت ملک آتا نیام اٹ تعلقداری ہر ہنوک آ دے اتون سوگو آن سوگو مرسا مننگ ءِ۔ چین و پاکستان علاقائی و جہانی باندات آتیا اسہ وڑ نا موقف تخرہ و ہڑتوم آ سنگت ملک آک علاقائی وجہانی فورم تیا اسہ ایلو نا موقف نا مخ تفی ءِ کرینو، اسپیکر قومی اسمبلی پارے کہ چین پاکستان اقتصادی راہداری ڈٹ سنگت ملک چین انا کنڈآن پاکستان کن اسہ ٹیکی اسے چین پاکستان اقتصادی راہداری (سی پیک) و ون بیلٹ ون روڈ انا گام گیج مچ آ ڈیہہ نا شونداری و شونہالی نا ڈٹ ءِ۔ پارلیمان سی پیک ءِ سرسہبی اٹ ہمکنار کننگ کن تینا کڑد ءِ ادا کرسا کیک۔ پارلیمان نا سرپرستی ٹی غٹ صوبہ غاک بشمول آزاد کشمیر و گلگت بلتستان اٹ سیمینار اڈتننگ انگ ءِ۔ دا سیمینار تیٹی سی پیک تون تعلقدار اسٹیک ہولڈر آتا اوار مننگ آن سی پیک نا فائدہ غاتیٹی بھلو ودکی اس مریک۔ رشکئی اکنامک زون آن پاکستان اٹ صنعتی بشخ ءِ مون آ دننگک ہراڑآن علاقہ ٹی شونداری و شونہالی نا اسہ پوسکن ءُ دور اس بناکیک۔ ہڑتوم آ ملک آتا پارلیمان تا نیام اٹ رابطہ غاتا مون آ دننگ آن ہڑتوم آ کنڈآتا تعلقداری ءِ بڑزی تسکان سرکننگ مریک۔ اسپیکر قومی اسمبلی پاکستان و چین نا سفارتی تعلقداری نا 70 سال پورو مننگ آ ہڑتوم آ ملک آتا حکومت و الس ءِ مبارکبادی نا کلہو تس۔، اسپیکر چین و پاکستان نا سفارتی تعلقداری نا 7 دہائی پورو مننگ نا وخت آ ہڑتوم آ اسپیکر آک ورچوئل کانفرنس نا سلاہ غان امنا کریر۔ چینی سفیر پارے کہ چین پاکستان تون تینا بے مٹ سنگتی ءِ قدر انا نظر اٹ ہرک۔ چین نا خارجہ پالیسی ٹی پاکستان تون سنگتی ءِ کلیدی اہمیت اس دوئی ءِ۔ چین و پاکستان اسہ ایلو نا ڈکھ و سکھ انا سنگت ءُ و ہڑتوم آ ملک آک ہر مشکل وخت اٹ اسہ ایلو تون تفینو۔ چین پاکستان واپاری کچ و زرگزرانی کمکاریءِ پین ودفنگ نا خواہندار ءُ ، چینی سفیر پارے کہ اسپیکر آتا ورچوئل کانفرنس آن تین پہ تین پارلیمانی تعلقداریک پین سوگو مریرہ۔
