اسلام آباد۔ 29 دسمبر (اے پی پی) چیئرمین سینیٹ محمد صادق سنجرانی نا سلہ غا پاکستان آ سرمروک آ افریقی یونین نا پارلیمانی ڈل سے شنبے نادے آ پارلیمنٹ ہاؤس نا دورہءِ کرے و چیئرمین سینیٹ سینیٹر محمد صادق سنجرانی تون اوڑدہی کرے۔ 12 باسکی ڈل تدوک آ دے پاکستان نا دورہ غا سرمسوسس۔ چیئرمین سینیٹ داوخت آ گپ وتران کرسا پارے کہ پاکستان افریقی ملک آتون تعلقداری تے قدر انا نظر اٹ ہرک، افریقی ملک آتون برادرانہ تعلقداری ءِ پین سوگو کننگ نا بابت پاکستان افریقین پالیسی نا داسال تجدید ءِ کرینے۔ افریقی ملک آک براعظم افریقہ نا درگہ و بحیرہ عرب اٹ پاکستان نا خڑک انگا جغرافیائی ہند اتون گنڈوک مننگ نا سوب آن پاکستان کن خاص اہمیت تخرہ، پاکستان افریقی ملک آتیٹی سفارتخانہ و مشن نا کچ اٹ ہم نمان ودکی کرینے۔ اوپارے کہ جبوتی بین الحکومتی شونداری ادارہ (آئی جی اے ڈی) نا صدر مقام مننگ نا سوب آن افریقی و دے ٹکی افریقن کمیونٹی ٹی امن نا مون آ دننگ کن نمان کڑد ادا کننگ ءِ۔ اوپارے کہ تدوک آہفتہ اڈ ہلوک آ آئی جی اے ڈی سروک کانفرنس آن ہم ڈیہہ نا حالیت آتیٹی نمان گچینی بریک، پاکستان ءِ آئی جی اے ڈی نا آبزرور باسک جوڑ کننگ کن کمک فراوان کننگے۔ اوپارے کہ پارلیمانی ڈل انا ہن و بر آن ہڑتوم آ ملک آک اسہ ایلو نا آزموندہ غاتیان فائدہ ہرفنگ کیرہ۔ پارلیمانی ڈل آتا ہن و بر آن پاکستان و افریقی ملک آتا تعلقداریک پین سوگو مریرہ۔ اوپارے کہ جمہوریہ جبوتی نا جدت و شونداری کن صدر اسماعیل عمر گیلہ نا کڑد ستاکڑزک۔ چیئرمین سینیٹ پارے کہ پاکستان و ایتھوپیا نا نیام اٹ ڈغار نا کمک اٹ واپار جبوتی نا توسط اٹ مریک۔ پاکستان ءِ ایتھوپیا اسکان گڑاتا زوت فراوانی کن خصوصی بایدے موکل ملے۔ اوپارے کہ آب اٹنگا خذمت آتیٹی زرکاری و ودکی کن پاکستانی زرکار و کاروباری بندغ آتیکن خصوصی پیکج اس وضع کننگے۔ اوپارے کہ جبوتی چندی ایشیائی ملک آتیان کشاری و تیار مروک گڑادرآمد کیک۔ دامارکیٹ اٹ پاکستان نا بشخ مفننگ نا بریبر ءِ۔ اوپارے کہ پاکستان جبوتی ءِ سفارتکاری، بینکاری و ریلوائی نا بشخ اٹ تربیت نا آسراتی فراوان کننگ ءِ، پاکستان جبوتی نا نیام اٹ گوازی نا بشخ خاص کر فٹ بال نا شونداری کن رابطہ غاتے ودفنگے۔ چیئرمین سینیٹ پارے کہ پاکستان جبوتی ءِ دینی مرض کوویڈ۔ 19 ءِ کنٹرول کننگ کن تکنیکی و طبی کمک فراوان کننگ کن تیار ءِ۔ چیئرمین سینیٹ پارے کہ افریقہ ٹی اقوام متحدہ نا امن قائم کننگ نا بابت آپریشن اٹ پاکستان نا تعمیراتی کڑد انا سوب آن افریقی ملک آتیٹی پاکستان ءِ بھاز قدر انا نظر اٹ ہُننگک۔ اوپارے کہ بھارت مقبوضہ کشمیر اٹی انسانی حق انا بدترین پامالی تا مرتکب مننگ ءِ، مقبوضہ کشمیر نا ویل ءِ اقوام متحدہ نا قرارداد و کشمیری الس نا است خواہی تا رداٹ ایسر کروئی مریک۔
