اسلام آباد۔ 29 دسمبر (اے پی پی) پاکستان مقبوضہ جموں و کشمیر اٹ مسہ بے گناہ کشمیری مزور آتا عدالت آن ایڑتر خون نا جہانی کہول آ آجو جاست وپاست نا تینا خواست انا درشانیءِ کرے۔ ہر مسٹ آ کشمیری مزور آتے بھارتی کوزہ گیر فورس اینخو سال جولائی ٹی شوپیاں ٹی مروک آ اسہ جعلی مقابلہ اسے ٹی شہید کریسس۔ سے شنبے نادے آ ترجمان دفترخارجہ نا رداٹ مقبوضہ کشمیر اٹی مزور آتا جعلی مقابلہ ٹی زوال کننگ نا انکشاف، کشمیری الس نا برخلاف مروک آ بھارتی ڈوہ انا پیدوار شاہدی ءِ۔ ترجمان پارے کہ کشمیری الس نا برخلاف بھارتی ڈوہ انا فہرست بھاز مرغن ءِ۔ ترجمان پارے کہ مقبوضہ کشمیر اٹی تدوک آ اسہ سال اٹی زالبول و چناتتون اوار 300 آن زیات بے گناہ کشمیری تے جعلی مقابلہ غاتیٹی شہید کننگانے۔ پاکستان مقبوضہ کشمیر اٹ بھارتی کوزہ گیر فوج انا کنڈآن بے گناہ کشمیری تا عدالت آن ایڑتر کشت وخون نا کنڈآ پدریسہ جہانی برادری نا چکار ءِ کرفنگ ءِ وخت اس کہ اقوام متحدہ نا ہائی کمشنر انسانی حق انا دفتر کشمیر نا بابت 2018و 2019ء نا تینا اِر احوال آتیٹی ہم عدالت آن ایڑتر خون نا اعتراف کرینے۔ پاکستان جہانی برادری آن خواست کرے کہ او کشمیری الس نا برخلاف ڈوہ آ بھارت نا احتساب ءِ کے و اقوام متحدہ نا سلامتی کونسل نا تعلقدار قرارداد و کشمیری الس نا است خواہی تا رداٹ جموں و کشمیر جھیڑہ نا ایسری کن کاریم کے۔
