اسلام آباد۔ 29 دسمبر (اے پی پی) قومی احتساب بیورو نا ایگزیکٹو بورڈ انا دیوان قومی احتساب بیورو نا چیئرمین جسٹس ر جاوید اقبال نا کماشی ٹی نیب ہیڈکوارٹر اسلام آباد اٹی اڈ ہلک۔ دیوان اٹی سید اصغر حیدر، پراسیکیوٹر جنرل اکاؤنٹیبلٹی نیب، ظاہر شاہ، ڈی جی آپریشن نیب، عرفان نعیم منگی، ڈی جی نیب راولپنڈی و ایلوسینئر آفیسر آک دیوان اٹی بشخ ہلکر۔ نیب انا دا دیرینہ پالیسی ءِ کہ قومی احتساب بیورو نا ایگزیکٹو بورڈ انا دیوان نا بارواٹی سرجم آتے الس ءِ فراوان کننگے ہراوڑوڈول تدوک آ کیہی سال آن رائج ءِ۔ ہرانا مسخت کس اسے نا است آزاری مسخت اف۔ نیب اسہ انسان دوست ءُ ادارہ اسے ہرا کانود نا رداٹ ہر بندغ نا عزت نفس انا شرف ءِ کننگ آ یخین تخک۔ نیب اناغٹ انکوائری وانویسٹی گیشن مبینہ دوبہ غاتا بنداو آ بناکننگک ہراکہ حتمی مفک۔ نیب کانود نا رداٹ غٹ تعلقدار بندغ آتیان اوفتا موقف ءِ معلوم کننگ آن پد مستی جاست وپاست کننگ یا کپننگ نا فیصلہ ءِ کیک۔ قومی احتساب بیورو نا ایگزیکٹو بورڈ انا دیوان اٹی جعلی بینک اکاؤنٹس کیس اٹ اعجاز ہارون مسکوہی چیئرمین پی آئی اے، عبدالغنی مجید و ایلوفتا برخلاف ریفرنس دائر کننگ نا منظوری ءِ تننگا۔ دوبہ دار آتیا غیر کانودی وڑاٹ اوورسیز کوآپریٹوہاؤسنگ سوسائٹی لمیٹڈ(کڈنی ہلز) کراچی نا پلاٹ آتا جعلی الاٹمنٹ و فیک بینک اکاؤنٹ آتیان زرتس نا دوبہ ءِ۔ ہراڑآن قومی خزانہ ءِ بھلو نسخان اس رسینگا، قومی احتساب بیورو نا ایگزیکٹو بورڈ انا دیوان اٹی فیڈرل گورنمنٹ ایمپلائز ہاؤسنگ فاؤنڈیشن نا آفیسر، کارندہ غاتا برخلاف انکوائری نا منظوری ءِ تننگا۔ قومی احتساب بیورو نا ایگزیکٹو بورڈ انا دیوان اٹی سوست ڈرائی پورٹ آ تعینات کسمٹمز ڈیپارٹمنٹ نا آفیسر/کارندہ غاتا برخلاف سرکاری فرض انا انجام تننگ اٹ مبینہ غفلت نا بابت غاو کانود نا رداٹ سرتننگ کن فیڈرل بورڈ آف ریونیو(ایف بی آر) آ گدریفنگ نا منظوری ءِ تس۔ قومی احتساب بیورو نا ایگزیکٹو بورڈ پارے کہ نیب کانود نا رداٹ پارلیمنٹ و پارلیمنٹیرین نا تقدس و شرف آ یخین تخک۔ بزنس کمیونٹی ملک انا شونداری ٹی اہم کڑد ادا کیک ۔ نیب دا بے بنداو تاثر نا سختی اٹ تردید ءِ کیک کہ نیب انا سوب آن بزنس کمیونٹی ءِ فریشانی ارے۔ نیب مدام آئین و کانود نا رداٹ تینا فرض ءِ ادا کننگ آ یخین تخک ہراکہ بزنس کمیونٹی و پاکستان نا ایلو غٹ تپہ غاتا ہم است خواہی ءِ تانکہ ملک ءِ کرپشن آن پاک اسہ شونہال و شون ہلوک ملک اس جوڑ کننگ اٹ کمک ملنگ کے۔،، نیب وضاحت کرینے کہ اونا تحویل اٹ ہچ ءُ بندغ اس زوال کتنے۔نیب گڑاس زموار آتا کنڈآن دابابت پروپیگنڈاءِ یکسر مسترد کرساپارینے کہ داوڑنا گمراہ کن و سٹی آ مہم، نیب ءِ تینا آئینی و کانودی فرض انا پورو کننگ آن توننگ کپک۔ نیب دا چرجوئی ٹی بے بنداو، من گھڑت، گمراہ کن و نیب انا ساکھ ءِ نسخان تروک آتا برخلاف نیب آرڈیننس نا شق (a)31نا رداٹ کانود نا رداٹ جاست وپاست نا فیصلہ کرینے۔ ملک آن وڈی خوری نا چٹفنگ و کرپشن فری پاکستان نیب انا اولیت ءِ۔ نیب تینا جوڑ مننگ آن داتم اسکان 714 ارب روپئی بالواسطہ و بلاواسطہ وڑاٹ وڈی خور زموار آتیان برآمد کرسا قومی خزانہ ٹی جمع کرفے۔ نیب انا کارکڑد انامتبر قومی و جہانی ادارہ غاک ہم ستاءِ کرینو ہرا نیب اکن شرف نا ہیت اسے۔
