اسلام آباد۔ 29 دسمبر (اے پی پی) چیئرمین سینیٹ محمد صادق سنجرانی نا سلہ غا افریقی یونین نا قائم مقام چیئرمین و جبوتی نیشنل پارلیمنٹ نا صدر محمد علی حاومید تینا دُوانزدہ باسکی ڈل اتون اوار پاکستان آ سرمس۔ بالی پٹ آ سینیٹر مہمان داری مرزامحمد آفریدی افریقی پارلیمانی ڈل ءِ بخیر کرے۔ داوخت آ گپ وتران کرسا اوپارے کہ پاکستان و افریقی پارلیمان نا نیام اٹ تعلقداری نا پوسکن آ دور بناکننگ ءِ۔ تینا وڑنا یکتا دورہ غا بروک آ ڈل ءِ است انا حب اٹ بخیر اٹ پانہ۔ اومیت ءِ کہ ہڑتوم آ ملک آتا نیام اٹ پارلیمانی ڈل آتا ہن و بر اٹی پین ودکی مریک۔ ڈل اہم اوڑدہی تیان بیدس پاکستان نا چندی علاقہ غاتا دورہ ءِ ہم کیک۔ سینیٹ سیکرٹریٹ نا رداٹ ڈل انا چیئرمین سینیٹ، صدر پاکستان، وزیراعظم پاکستان، وزیر خارجہ، اسپیکر قومی اسمبلی اسد قیصر و آرمی چیف، آزاد جموں کشمیر نا صدر و نیوی نا چیف اتون اہم اوڑدہی شیڈول اٹی ارے۔ چیئرمین سینیٹ نا پاننگ ءِ کہ پاکستان و افریقی ملک آتا پارلیمان نا نیام اٹ تعلقداری تے سوگو کننگ کن دا دورہ بھاز اہمیت تخک۔ پاکستان افریقی ملک آتون پارلیمانی تعلقداری تے بھاز اہمیت ایتک۔ پارلیمانی رابطہ غاتا کمک اٹ واپاری تعلقداری تے سوگو کننگ اٹ کمک رسینگک۔
