اسلام آباد۔ 29 دسمبر (اے پی پی) پٹرولیم ڈویژن نا ترجمان پارینے کہ جہانی کہول آ گیس انا خواست و رسینگ نا حالیت آتا رداٹ سیڷ اٹی تیرمہ نا مقابلہ ٹی ایل این جی نا سپاٹ پرائس زیات مریک۔ سیڷ انا نہاد نا تیرمہ نا مریس مدتی معاہدہ غاتا نہاد اتون موازنہ ءِ کننگ مفک۔ سے شنبے نادے آ اسہ بیان اسے ٹی ترجمان پارے کہ سیڷ انا سپاٹ نہاد نا مریس مدتی معاہدہ نا نہاد اتون موازنہ سوف و سنگترہ نا موازنہ کننگ آنبار ءِ۔ 2020اٹی پاکستان غٹ ایل این جی کارگوتے 6.84 ڈالر نا اوسط نہاد آ ہلکونے و دافتے ٹی جنوری،فروری، نومبر و دسمبر 2020کن سیڷ انا زیات نہاد والا کارگوک ہم اوار ءُ وخت اس کہ اینخو سال مریس مدتی معاہدہ نا رداٹ معاہدہ غاتا رداٹ غٹ کارگوتے 8.06 ڈالر نا اوسط نہاد آ دوئی کننگانے ہراکہ 18 درسد زیات ءِ۔ پی ایل ایل پیپرا رولز آ عملدرآمد نا پابند ءِ ہرانا رداٹ 30 دے انا ٹینڈر کن پین 10 دے المی ءِ و ہراتم ہم گیس انا خواست پک مریک پی ایل ایل داڑآن 90 آن 100 دے مست ٹینڈر نا عمل نا بناءِ کیک۔ داوار وار آ پاننگ انگ ءِ کہ 2019اٹی اکتوبر دسمبرکن ٹینڈر اگست اٹ جاری کننگا وخت اس کہ 2020اٹی ٹینڈر تاخیر اٹ جاری مس۔
