اسلام آباد۔ 28 دسمبر (اے پی پی) بنجائی وزیر داخلہ شیخ رشید احمد پارینے کہ اسلام آباد انتظامیہ نا اول سرآن تنظیم، سٹامپ ڈیوٹی کم و پٹوار خانہ غاتے چٹفنہ، بڑزکو آب انا فوڈ نائٹ بازار جوڑ کینہ، غٹ گاڈیک اسہ دے اٹی رجسٹر مریرہ، ای سٹمپنگ نا بناءِ کننگک، صحافی تیکن ہنکینی ڈٹ جوڑ کننگک، لانگ مارچ لونگ مارچ اس مریک، اپوزیشن استیفہ غاتیا سجفک و سینیٹ گچین کاری تیٹی بشخ ہلیک، عمران خان این آر او تفک، جے یو آئی تہہ ٹی ہم لے دے مننگ ءِ، (ن) لیگ ضیاء نا پن ءِ انت اکن ہلپک ہرانا دا پالشیک و مالشیک ئسر، فوج جمہوریت تون تفوک ءِ، سیاست اٹی ئس، ارے، نئے بریک۔ داخیال آتا درشانی ءِ او دوشنبے نادے آ چیف کمشنر آفس اٹ میڈیا نا نمائندہ غاتون گپ وتران کرسا کرے۔ اوپارے کہ اسلام آباد انتظامیہ نا اول سر آن تنظیم کننگک، غٹ گاڈی تے اسہ دے اٹی اسہ جاگہ غا غٹ آسراتی تے ترفسا رجسٹر کننگک، ای سٹمپنگ نا بناءِ ہم کننگک، اسلام آباد اٹی ٹریفک پولیس، نادرا و آئی سی ٹی نا چندی ادارہ غاتون تعلقدار غٹ خذمت آتے اسہ ہی چھت انا کیرغ آن تننگک، اسلام آباد اٹی پوسکن و آب انا وڑ انا اِرا نائٹ فوڈ بازار جوڑ کننگک ہرامچ آ نن ملوک مریرہ، دافتے ٹی بڑزکو آب انا بھلو شاپ اس ہم مریک، اسلام آباد اٹی پٹوار خانہ ءِ چٹفنہ، اسٹامپ ڈیوٹی اِرا درسد آن کم کینہ، ایلو شار تیٹی اسہ درسد ءِ، ہشت محکمہ ءِ ضم کینہ، اسلام آباد انتظامیہ نا تنظیم نو کننگک۔ سیاسی حالیت آتیا ہیت کرسا او پارے کہ مراد علی شاہ درو وزیراعظم بلاول نا نعرہ خلککہ، ملک آ رحم کیر، انڈر۔ 19 گوازی کپس، لانگ مارچ و لونگ مارچ اٹ پرخ مریک، شیخ رشید احمد پارے کہ اپوزیشن سینیٹ گچین کاری ٹی بشخ ہلیک و استیفہ غاتا معاملہ غا دُوارہ سجفک۔ اوپارے کہ اپوزیشن باسک آتا اسہ جاگہ غا تولنگ ٹائپ مروک استیفہ غاتے جمع کرفنگ غیر کانودی ءِ، استیفہ غاک بایدے دوٹی لکھنگر، ہراتم لونگ مارچ انا وخت بریک تو فیصلہ کینہ کہ اوڑتون امر مون تروئی ءِ، آصف علی زرداری جیل آتا زیات وخت ہسپتال آتیٹی گدریفینے، اودے سماءِ کہ جیل آن بچنگ کن ہراہرا وڑوڈول ءِ کاریم اٹ اتنگک، اوکریمنالوجی ٹی پی ایچ ڈی کرینے و چاہک کہ جیل آن ہراوڑ تینے بچفوئی ءِ، اپوزیشن نا جنگ عمران خان نا جاگہ غا نیب اتون ءِ، ای عمران خان نا وزیر اُٹ و ہراوڑ او پرمان کیک اوفتیا چلینگیوہ و اوفتارداٹ اوفتا استقبال ءِ کننگ نا سجفیوہ۔ اوپارے کہ اسلام آباد اٹی ناکہ غاتے نن چٹفینن، اوفتا جاگہ غا موٹرسائیکل و گاڈی تیا پولیس گشت کیک۔ اسہ سوج اسے نا ورندی ٹی اوپارے کہ اسلام آباد اٹی 540 مدرسہ ءُ اسٹ ارٹ آن بیدس غٹ پرامن ءُ، جے یو آئی (ف) نا تہہ ٹی ہم بھلو لے دے اس مننگ ءِ۔ وزیر داخلہ پارے کہ مچ آ پاکستان نا صحافی تیکن ہنکینی ڈٹ اس جوڑ کننگ نا پارت کرینن، پرنٹ و الیکٹرانک میڈیا تون وابستہ غٹ صحافی و کیمرہ مین تے اوفتا تینا گچین باڈی نا کمک اٹ پلاٹ تننگک۔ دا ڈٹ مفت مفک۔
