اسلام آباد۔ 28 دسمبر (اے پی پی) چیئرمین سینیٹ محمد صادق سنجرانی سینیٹر گودی کلثوم پروین نا کزیت آ ہڑزخواہی و دعا پاتیا کن پارلیمنٹ لاجز اٹ واقع اونا اُراغا ہنا ہراڑے او سینیٹر کلثوم پروین نا خاہوت تون ہڑزخواہی کرے۔ سینیٹ سیکرٹریٹ نا رداٹ چیئرمین سینیٹ غمزدہ خاہوت تون زرس وخت تیر کرے، اوپارے کہ کلثوم پروین نا کزیت آ او بھاز غمزدہ ءِ۔ آزمائش نا داساہت اٹ نن خاہوت نا ڈکھ اٹی بریبر نا شریک اُن۔ چیئرمین سینیٹ پارے کہ سینیٹر کلثوم پروین نا کزیت آن ایوان بالا اسہ فعال باسک و پروگریسیو سوچ تخوک ءُ مدبر سیاست دان اسے آن محروم مس۔ کلثوم پروین نئے بیرہ بلوچستان اٹ پسماندہ تپہ غاتا پبی نمائندگی ءِ کرے بلکن ملکی سیاست اٹ ہم اہم کڑد ادا کرے۔ ایوان بالا ٹی اونا مثبت کڑد و الس کن اونا خذمت آتے مدام یات تخنگک۔ اودعاکرے کہ اللہ تعالیٰ ایماندار نا بخشش و درجہ غاتے بڑز کے۔ داوخت آ سینیٹرز جاوید عباسی، سجاد حسین طوری، مرزامحمدآفریدی، نصیب اللہ بارزئی و بلوچستان عوامی پارٹی نا اسلام آباد چیپٹر نا صدر عبدالقادر ئسک ہم چیئرمین سینیٹ تون اوار ئسر۔
