واشنگٹن۔ 28 دسمبر (اے پی پی) امریکی صدر ڈونلڈ ٹرمپ کورونا دین آن زہمی بندغ آتا بحالی نا ریلیف و حکومتی خڑچ آتا مد اٹ عبوری ودکی کن 23 کھرب ڈالر نا بل آ دستخط کرے و اودے کانود نا درجہ تس۔ جرمن خبر رساں ادارہ نا رداٹ امریکی صدر داکان مست تدوک آ ہفتہ کانگرینس نا منظور کروک بل ءِ بلاک کننگ نا دھڑکو ترسا پاریسس کہ او مخلوق ءِ بھلو ریلیف پیکج اس تننگ خواہک۔ امریکی صدر تدوک آ دے ریاست فلوریڈا ٹی تینا ریزارٹ مارا لاگو آن بل آ دستخط کننگ نا پڑو ءِ کرسا پارے کہ او بے روزگار بندغ آتا فائدہ، کراتیٹی کمک کننگ، چنکا کاروبار نا براہ راست وام تا زرتس، ہندی جہاز آتا ملازم آتا کاریم آ پدی بننگ، ویکسین نا فراوانی کن پین زر انا فراوانی و ایلو کیہی امور نا سرتننگ کن دابل آ دستخط کننگ ءِ۔ داپڑو آن منہ گھنٹہ مست امریکی صدر تینا اسہ ٹویٹ اسے ٹی پاریسس کہ کورونا دین آن بحالی نا کمکی بل آ جوان ءُ خبر اسے۔ داکمکی پیکج اٹ بنجائی حکومت نا لس خڑچ آتیکن 14 کھرب ڈالر ہم اوار ءِ۔ صدر ڈونلڈ ٹرمپ اگہ دا بل آ دستخط کتوکہ تو حکومتی خڑچ آتا مد اینو(سے شنبے) آن چٹوک ئس ہرانا سوب آن لکھ آ بنجائی ملازم آتے معاوضہ و تنخواہ تا زرتس سلیسکہ۔
