اسلام آباد۔ 24 دسمبر (اے پی پی) اسپیکر قومی اسمبلی اسد قیصر پارینے کہ ملک ءِ مون تروک ویل آتون مون تننگ کن ننے قائد اعظم نا پاروک آ راہشون اصول آتے تینا کروئی مریک۔ داخیال آتا درشانی ءِ او قائد اعظم نا 144 می ودی دے انا وخت آ کرے ہرا 25 دسمبر آ بھاز جم و جوش اتون اڈتننگ انگ ءِ۔ داوخت آ اسپیکر پارے کہ قائد اعظم محمدعلی جناح 20 می صدی نا عظیم راہشون و مسلم امہ نا سیوت نا علامت ئس۔ اسپیکر پارے کہ قائد اعظم محمد علی جناح ہراکارنامہ غاتے سرتس تاریخ اونامتوازی ءِ پیش کننگ آن قاصر ءِ۔ اوپارے کہ قائد اعظم نا اصول سیوت، ایمان و تنظیم ءِ تینا کرسا نن نئے بیرہ ملک ءِ مون تروک ویل آتا مون ءِ توننگ کینہ بلکن تینا عملی زند ءِ ہم گچین کننگ کینہ۔ اسپیکر پنی آ مورخ سٹینلے ولپرٹ نا حوالہ ءِ تس ہراقائد اعظم ءِ خراج تحسین پیش کرسا پاریسس کہ دنیا ٹی داوڑنا بندغ بھاز کم ءِ ہرافک تاریخ ءِ بدل کرینو۔ ہموفتا کچ داکان ہم کم ءِ ہرافک دنیا نا نقشہ ءِ بدل کرور۔ اوپارے کہ قائد اعظم نا قائدانہ لائخی تا بھرم ئس کہ برصغیر اٹ جوڑ انگریز سامراج ءِ شکست مس و ننے پاکستان نا دروشم اٹ اسہ آجو مملکت اس رسینگا۔
