انقرہ ٹی پاک ترکی بڑزکو کہولی ملٹری ڈائیلاگ پڑک نا 15 می دیوان

اسلام آباد۔ 24 دسمبر (اے پی پی) پاکستان بڑزکو کہولی ملٹری ڈائیلاگ پڑک (ایچ ایل ایم ڈی جی) نا 15 می دیوان 22،23 دسمبر اسکان انقرہ ٹی اڈ ہلک۔ ڈپٹی چیف آف ترک جنرل اسٹاف جنرل سیلیوک بیر کارتواولو ترک ڈل انا کماشی ءِ کرے وخت اس کہ لیفٹیننٹ جنرل (ر) میاں محمد ہلال حسین، سیکرٹری دفاع مذاکرات اٹ پاکستان نا ڈل انا کماشی ءِ کریر۔ ایچ ایل ایم ڈی جی دیوان اٹی ہڑتوم آ ڈل آک فوجی تربیت، تعلیم، دہشت گردی تور و دفاعی صنعت اٹ اسیجائی پیدوار و ہلنگ تون اوار تین پہ تینی کمکاری نا غٹ وارخواہی تیا گپ وتران کریر۔ ہڑتوم آ کنڈآک دے ٹک نیامی، سویلی ایشیاو اوغانستان تون اوار ساڑی علاقائی چاگڑد نا بارواٹ اسیجائی نقطہ نظر آ گپ وتران کریر۔ کڑدہ غاک دفاعی کمکاری ءِ پین سوگو کننگ نا عزم ءِ ودفیر۔ دا دیوان اٹی دا پیش رفت نا ہم جاچ ءِ ہلنگا ہرا تدوک آ سال اپریل اٹ پاکستان اٹ مروک آ ایچ ایل ایم ڈی جی نا آخیریکو دیوان آن پد آن مسنے۔ ایچ ایل ایم ڈی جی پاکستان و ترکی نا نیام اٹ بڑزکو کہولی ادارہ جاتی میکانزم ءِ، ہرادے چارٹر پالیسی و دفاعی پڑاٹ تعلقداری تے مون آ دننگ کن عملی ڈٹ آتا پابند کننگانے۔ پاکستان۔ترکی ایچ ایل ایم ڈی جی نا بروک آ دیوان 2021 ء ٹی پاکستان اٹی اڈ ہلیک۔ لیفٹیننٹ جنرل (ر) میاں محمد ہلال حسین ترکی نا وزیر قومی دفاع ہولوسی اکار، چیف جنرل ترک اسٹاف جنرل یاسر گلر، ترکی نا دفاعی صںعت آتا صدر پروفیسر ڈاکٹر اسماعیل ڈٛیمر و ترک ایرواسپیس نا سی ای او ڈاکٹر تیمل کوٹل تون جتا اوڑدہی کرے۔ پاکستانی ڈل دفاعی صںعتی فرم بشمول بائیکار(یو اے وی او ای ایم) ایسالسان، ہیوالسان وTAI  نا ہم دورہ ءِ کرے۔