اسلام آباد۔ 24 دسمبر (اے پی پی) بنجائی وزیر منشیات تور بریگیڈیئر(ر) اعجاز احمد شاہ پارینے کہ کورونا دین انا شدت اٹ پدریسہ ودکی مننگ ءِ، رکھی گام گیج آتیا مست آن زیات عمل کننگ نا گرج ءِ، پاکستان اٹ غٹ اقلیت آک رکھوک ءُ، حکومت اقلیتی برادری نا ویل آتا ایسری کن پدریسہ کوشست کننگ ءِ۔ داخیال آتا درشانی ءِ او پنچ شنبے نادے آ ننکانہ صاحب نا علاقہ ینگسن آباد اٹی مسیحی برادری نا حقدار بندغ آتیٹی کرسمس ٹیکی بشخنگ نا دود آن تران و میڈیا تون گپ وتران کرسا کرے۔ بنجائی وزیر منشیات تور مسیحی برادری ءِ کرسمس نا مبارکبادی ترسا پارے کہ حکومت مسیحی برادری نا ویل آتے اولیتی بنداو تیا ایسر کننگ نا ہروڑنا کوشست کننگ ءِ۔ اوپارے کہ کورونا دین انا شدت اٹ پدریسہ ودکی مننگ ءِ، رکھی گام گیج آتیا مست آن زیات عمل کننگ نا گرج ءِ۔ داوخت آ میڈیا تون گپ وتران کرسا بنجائی وزیر منشیات تور پارے کہ پاکستان دنیا نا اسٹ انگا ملک ءِ ہرانا قومی بیرک اٹ اقلیت آتے نمائندگی تننگانے۔ اوپارے کہ پاکستان اٹ اقلیت آتے بریبر نا حق دوئی ءِ۔
