اسلام آباد۔ 24 دسمبر (اے پی پی) بنجائی وزیر خزانہ ڈاکٹر عبدالحفیظ شیخ اقتصادی چیلنج آتون مون تننگ اٹ زری ومالیاتی پالیسیز کوآرڈینیشن بورڈ انا فعال کڑد انا گرج آ زور شاغسا پارینے کہ کلی زرگزران نا ہدف آتا دوئی کننگ اٹ مانیٹری وفسکل پالیسیز کوآرڈینیشن بورڈ انا غٹ تعلقدار اسٹیک ہولڈر آتا نیام اٹ گچین رابطہ غاتا گرج ءِ، ڈاکٹر عبدالحفیظ شیخ موثر پالیسی سازی کن اقتصادی ڈیٹا نا وخت آ فراوانی نا پارت ہم کرینے۔ زری و مالیاتی پالیسی رابطہ بورڈ انا دیوان پنچ شنبے نادے آ داڑے بنجائی وزیر خزانہ ڈاکٹر عبدالحفیظ شیخ نا کماشی ٹی اڈ ہلک۔ وزیراعظم نا سلاہکار واپار و زرکاری، ڈپٹی چیئرمین پلاننگ کمیشن ، گورنر اسٹیٹ بینک، ڈاکٹر اسد الزمان و وزارت خزانہ نا سینئر کمامدارآک دیوان اٹی بشخ ہلکر۔ چیئرمین ایف بی آر محمد جاوید غنی خصوصی سلہ غا دیوان اٹی بشخ ہلک سیکرٹری خزانہ نوید کامران بلوچ ملک انا ساڑی اقتصادی حالیت آتیا دیوان اٹی بشخ ہلوک آتے حوال تس۔ اوپارے کہ حکومت نا وخت آ پالیسی و گام گیج آتیٹی کورونا دین انا جہانی دین انا پاکستان نا زرگزران آ دنیا نا ایلو زرگزران تا مقابلہ ٹی زرگزرانی اثرآتے کم کننگ اٹ کمک رسینگا۔ برجامالی سال انا اولیکو پنچ تُو اٹی پاکستان نا زرگزران بھلو حد اسسکان بحالی نا کنڈآ ہِننگ ءِ۔ گورنر اسٹیٹ بینک دیوان ءِ پارے کہ آسراتی تیا مبنی زری پالیسی نا سوب آن اقتصادی بحالی ٹی کمک رسینگ انگ ءِ۔
