اسلام آباد۔ 24 دسمبر (اے پی پی) کابینہ نا اقتصادی رابطہ کمیٹی (ای سی سی) دیامر بھاشا و مہمند ڈٛیم انا تفنگ کن مالی وسیلہ فراوان کننگ نا رداٹ 500 ملین ڈالر مالیت نا یورو بانڈ انا جاری کننگ نا منظوری ءِ تس، اقتصادی رابطہ کمیٹی نا دیوان اٹی کراچی ٹرانسفارمیشن پلان آ سرجم سجفنگا و اونا تائید ءِ کننگا، ای سی سی پارت کرینے کہ غٹ تعلقدار حلقہ غاتیان منظوری ہلنگ آن پد اودے کابینہ نا مون آ پیش کننگک، ڈاکٹر عبدالحفیظ شیخ کراچی ٹرانسفارمیشن پلان نا بابت ضابطہ نا غٹ خواست آتے پورو کننگ نا ہم پارت کرے، دیوان اٹی 5 تیکنیکی ضمنی گرانٹ آتا منظوری ءِ تننگا۔ کابینہ نا اقتصادی رابطہ کمیٹی نا دیوان پنچ شنبے نادے آ داڑے بنجائی وزیر خزانہ ڈاکٹر عبدالحفیظ شیخ نا کماشی ٹی اڈ ہلک۔ دیوان اٹی بنجائی وزیر نجکاری محمد میاں سومرو، وزیر توانائی عمرایوب خان، وزیر صںعت و پیدوار حماد اظہر، سلاہکار واپار عبدالرزاق داؤد، وزیر ریلوائی اعظم سواتی، خصوصی کمکار پٹرولیم ندیم بابر، خصوصی کمکار بجلی تابش گوہر، وزیر بحری امور علی حیدر زیدی، وزیر آبی وسیلہ فیصل واوڈا و گورنر اسٹیٹ بینک رضاباقر ئسک ساڑی ئسر۔ دیوان اٹی وزارت آبی وسیلہ نا کنڈآن دیامربھاشا ڈیم و مہمند ڈیم انا تفنگ کن مالی وسیلہ غاتا فراوانی نا رداٹ واپڈا نا 500 ملین ڈالر مالیت نا یورو بانڈ انا سمری ءِ پیش کننگا۔ اقتصادی رابطہ کمیٹی 500 ڈالر یورو بانڈ انا جاری کننگ نا منظوری ءِ تس و دا رداٹ وڑوڈول ءِ طے کننگ کن وزیر خزانہ و اسٹیٹ بینک اتون سلابت کننگ نا پارت کرے۔ وزارت ڈٹ بندی، شونداری و خصوصی گام گیج نا کنڈآن کراچی ٹرانسفارمیشن پلان آ سرجم پریزنٹیشن تننگا۔ دیوان اٹی کراچی ٹرانسفارمیشن پلان آ سرجم سجفنگا و اونا تائید ءِ کننگا۔ ای سی سی پارت کرے کہ غٹ تعلقدار حلقہ غاتیان منظوری ہلنگ آن پد اوے کابینہ نا مون آ پیش کننگے۔ ڈاکٹر عبدالحفیظ شیخ کراچی ٹرانسفارمیشن پلان نا بابت ضابطہ نا غٹ خواست آتے پورو کننگ نا ہم پارت کرے۔ وزارت میری ٹائم افیئرز نا کنڈآن دیوان اٹی بی او ٹی نا بنداو آ 5 ٹرمینل آتا تفنگ نا رداٹ ماسٹر پلان اٹ ترمیم پیش کننگا۔ دا ٹرمینل آتا سوب بندرگاہ آ کنٹینر آتا ہنڈلنگ اٹ آسراتی رسینگک۔ اقتصادی رابطہ کمیٹی 2 ایل این جی ٹرمینل آتون اوار 5 ٹرمینل آتا جوڑ کننگ کن ماسٹر پلان اٹ منظوری تس، دافتے ٹی 2 کثیر المسخت کارگو ٹرمینل و اسہ مربوط کنٹینر ٹرمینل اوار ءِ ہرا بی او ٹی نا بنداو آ چلیفنگرہ۔ اقتصادی رابطہ کمیٹی نا دیوان اٹی وزارت توانائی نا کنڈآن سوئی کمپنی تا کنڈآن ایل این جی ایئر میکس پروجیکٹ آتے چٹفنگ نا سرجم سمری ءِ پیش کننگا، سرجم شرہ غان پد ای سی سی فیصلہ کرے کہ دروش، آیون و چترال ٹاؤن اٹ سوئی ناردرن نا دا پروجیکٹ آتے ترک کننگک، داڑکن ڈغار و ازباب آتے کم آن کم نسخان نا بنداو آ شفاف وڑاٹ ڈسپوز اپ کننگک۔ وزارت توانائی نا کنڈآن دیوان اٹی گورنمنٹ ہولڈنگ پرائیویٹ لمیٹڈ نا وام تا زرتس و آئی ایس جی ایس ایل گیس انادرآمد و بنداوی پنجر نا تفنگ نا بابت ڈٹ آتا بارواٹی سمری اس پیش کننگا، گورنمنٹ ہولڈنگز آئی ایس جی ایس ایل نا غٹ خڑچ و مصارف آتیکن 15 دسمبر 2016ء آ ای سی سی نا دیوان نا فیصلہ نا رداٹ درمیانی مد انا وام دوئی کریسس۔ دارداٹ چندی سلاہ تا جاچ ءِ ہلنگا۔ ای سی سی ہائی پاور بورڈ آن کلیئرنس نا حالیت اٹ سلاہ تا منظوری ءِ تس۔ دیوان اٹی وزارت صنعت وپیداوار نا کنڈآن کرائیو جینک آکسیجن ٹینک انا درآمد ڈیوٹی و خراج نا چٹفنگ نا سمری نا منظوری ءِ ہم تننگا۔ دیوان اٹی پاکستان کریڈٹ گارنٹی کمپنی نا شیئر ہولڈنگ سٹرکچر نا منظوری ءِ ہم تننگا۔پوسکن سٹرکچر نا رداٹ کمپنی ٹی حکومت نا شیئرز نا بشخ 70 درسد آن کم کرا 49 درسد کننگک۔ دیوان اٹی پائیدار ہدف اچیومنٹ پروگرام نا رداٹ چندی ڈٹ آتا پوروی کن 75.71 کروڑ روپئی، کم شون ہلوک علاقہ غاتیٹی طالب علم آتے فیس آتا پدی تننگ کن ہائر ایجوکیشن کمیشن نا درخواست آ 50 کروڑ روپئی، وزیراعظم نا کم خڑچ اُراتا تفنگ نا اسکیم نا رداٹ بے سود وام تا فراوانی کن 50 کروڑ روپئی، پی ایس ڈی پی نا رداٹ سندھ و بلوچستان اٹی وزارت ہاؤسنگ و پاک پی ڈبلیو ڈی نا رداٹ اسکیم تیکن 4189 ملین روپئی و آڈیٹر جنرل آف پاکستان نا جہانی بینک انا پبلک فنانشل مینجمنٹ اینڈ اکاؤنٹیبلٹی سروس ڈیلیوری پروجیکٹ کن 32.7کروڑ روپئی نا تکنیکی ضمنی گرانٹ آتا منظوری ءِ تننگا۔
