کوئٹہ۔ 24 دسمبر (اے پی پی) گورنر بلوچستان امان اللہ خان یاسین زئی پارینے کہ یوتھ پروگرام نا بناءِ صوبائی دارالحکومت کوئٹہ، خضدار، پشین، نوشکی، مستونگ و خاران تون اوار شش ضلع غاتیٹی کننگ انگ ءِ دا پروگرام نا رداٹ نن مچ آ صوبہ نا کسبکار ورناک تینا تغ تے ایسر اسکان سرکننگ نا کسر ءِ آوار کننگ کیرہ، داخیال آتا درشانی ءِ او پنچ شنبے نادے آ گورنر ہاؤس اٹی یوتھ پروگرام نا بنائی دود آن تران کرسا کرے۔ گورنر بلوچستان امان اللہ خان یاسین زئی پارے کہ یوتھ پروگرام نا اصل مسخت مر مر انگا ضلع غاتا ورناتے پوسکن آ کسب ہیل تننگ و کیریئر نا راہشونی نا وارخواہی تسکان رسینگ دوئی کننگ اٹ کمک و راہشونی فراوان کننگ ءِ۔ گورنر یاسین زئی دود آن تران کرسا مستی پارے کہ غٹ زرگزرانی و راجی سرجزآتیٹی ورناتا بشخ ہلنگ و اوار مننگ ءِ پالیسی سازی نا المی بشخ جوڑ کننگ وخت انا اہم ءُ گرج اسے، اوپارے کہ دا ضلع غاتا گچین یونیورسٹی آف بلوچستان، سردار بہادر خان ویمن یونیورسٹی و بیوٹمز یونیورسٹی تون اوار بلوچستان نا سرکاری یونیورسٹی تا سب کیمپس آتا ساڑی گری ءِ مون آ تخسا کننگانے۔ گورنر یاسین زئی پارے کہ بلوچستان نا ورناتے ریاست اسُل تنیا الیپک بلکن نما غٹ انا روشنا و شون ہلوک آخبت نا ضامن ءِ۔ گورنریوتھ پروگرام نا بنائی دود انا وخت آ بنجائی وزیر زبیدہ جلال، سینیٹر انوارالحق کاکڑ، سرکاری یونیورسٹی تا وائس چانسلرز، نواب زادہ سیف اللہ مگسی و انڈیویجول لینڈز انا سروک گل مبینہ بلال تون اوار ورناتا اسہ بھلو کچ اس ہم ساڑی ئسر۔
