چیئرمین سینیٹ محمد صادق سنجرانی نا یو اے ای نا سفیر تون اوڑدہی ٹی گپ وتران

اسلام آباد۔ 24 دسمبر (اے پی پی) چیئرمین سینیٹ محمد صادق سنجرانی تون متحدہ عرب امارات نا سفیر حماد عبید ابراہیم سالم الزابی پنچ شنبے نادے آ پارلیمنٹ ہاؤس اٹی اوڑدہی کرے و اہم امور، کورونا دین نا سوب آن ودی مروک آ حالیت، علاقائی و جہانی حالیت، ادارہ جاتی کمکاری آ گپ وتران کننگا۔ چیئرمین سینیٹ پارے کہ پاکستان ومتحدہ عرب امارات نا نیام اٹ تعلقداری نا بنداو اسیجائی روایت، مذہبی قدر و راجی مماثلت آتیاٹی ءُ۔ چیئرمین سینیٹ ہڑتوم آ ملک آتا نیام اٹ اقتصادی شونداری نا خاطر رابطہ غاتا مون آ دننگ آ زور شاغا۔ اوپارے کہ پارلیمانی کہول آ ڈل آتا ہن و بر و پاکستان اٹی زرکاری نا وارخواہی آن فائدہ ہرفنگ کن تین پہ تینی و رابطہ غاتے پین ودفنگ نا گرج ءِ۔ متحدہ عرب امارات پاکستان اٹ واپاری و اقتصادی بشخ آتیٹی زرکاری نا وارخواہی تیان فائدہ ہرفنگ کیک۔ چیئرمین سینیٹ پارے کہ ایشیائی پارلیمانی اسمبلی و ایلو اہم فورم تیا بے مٹ کمکاری ءِ۔ چیئرمین سینیٹ متحدہ عرب امارات اٹ رہینگوک آ پاکستانی کمیونٹی نا کورونا نا دین اٹی خیال تخنگ آ متحدہ عرب امارات نا حکومت و الس نامنت واریءِ ہرفے۔ اوپارے کہ ہڑتوم آ کنڈآتا کمکاری ءِ پین ودفنگ نا خواہندار ءِ۔ متحدہ عرب امارات نا سفیر پاکستان نا حکومت نا کنڈآن کورونا دین انا مون ءِ توننگ کن چست کروک آ گام گیج آتا ستاءِ کرے و پارے کہ لاک ڈاؤن نا سوب مشکلات ودی مس ولے حکومتی گام گیج آک ستاکڑزرہ۔