اسلام آباد۔ 24 دسمبر (اے پی پی) چیئرمین سینیٹ محمد صادق سنجرانی پارینے کہ پاکستان و چین نا نیام اٹ دیرینہ تعلقداری ڈیہہ نا زرگزرانی و راجی شونداری کن پوسکن آ عہد اٹ پترینگانے، پاکستان چین اتون تینا فقید المثل سنگتی آ گمر کیک، پارلیمانی ڈل آتا ہن و بر آن تین پہ تینی تعلقداری ٹی پین ودکی مسنے۔ داخیال آتا درشانی ءِ او پاکستان اٹ چین نا سفیر نونگ رونگ تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری و تین پہ تینی است خواہی نا باندات آ گپ وتران کننگا۔ اوڑدہی ٹی چیئرمین سینیٹ پارے کہ پاکستان و چین نا نیام اٹ دیرینہ تعلقداری ڈیہہ نا زرگزرانی و راجی شونداری کن پوسکن آ عہد اٹ پترینگانے۔ پاکستان چین اتون تینا فقیدالمثل سنگتی آ گمر کیک۔ پارلیمانی ڈل آتا ہن و بر آن تین پہ تینی تعلقداری ٹی پین ودکی مسنے۔ اوپارے کہ پارلیمانی سفارتکاری اہم ہڑتوم آ کنڈآتا رابطہ غاتے سوگو کننگ اٹ گچین ءُ کڑد اس ادا کیک۔ ہڑتوم آ ملک آتا نیام اٹ ادارہ جاتی کمکاری ءِ پین سوگو کننگ نا گرجءِ۔ السی کہول آ ہڑتوم آ کنڈآتا رابطہ غاتے پین سوگو تننگ آن دیرینہ شریداری پین سوگو مریک۔ صادق سنجرانی پارے کہ سی پیک ہڑتوم آ ملک آتا نیام اٹ برادرانہ تعلقداری نا سوگوی و علاقائی شونداری کن اسیجائی وژن نا نتیجہ ءِ۔ سی پیک ڈیہہ بلکن علاقائی شونہالی و شونداری نا تغ ءِ پورو کننگ نا پبی لائخی تخک۔ داوخت آ چینی سفیر پارے کہ پاکستان چین اکن بھاز اہم ءُ ملک اسے۔ ہڑتوم آ ملک آتا شونداری و شونہالی نا وژن اسٹ ءِ۔ اوپارے کہ سی پیک نا ڈٹ آن دا ڈیہہ جہانی واپار نا وت مریک۔
