اسلام آباد۔ 24 دسمبر (اے پی پی) بنجائی وزیر داخلہ شیخ رشید احمد پارینے کہ یکم جنوری آن دے ٹک نیامی آ ہنوک آ غٹ خواری کش آتے پنچ انا جاگہ غا دہ سال اکن پاسپورٹ جاری کننگک، منہ تُو اٹی پوسکن و جدید ای پاسپورٹ جاری کننگ نا بناءِ کینہ، ای سروس نا دمدستی بناءِ کننگک وخت اس کہ 120 دے انا تہہ ٹی ایکسپریس پاسپورٹ ءِ ہم جاری کننگک، ای سی ایل و بلیک لسٹ ءِ محدود کننگک، مولانا فضل الرحمان تون اوار 20 بندغ ءِ بھاز سیکورٹی خطرہ ءِ۔ مولانا فضل الرحمان غٹ ءِ رند اٹ خلکونے، اومیت ءِ پیپلزپارٹی گچین گوازی کیک۔ مالانابے چیٹی تالان کننگ و مدرسہ غاتا طاقت ءِ اسلام آباد اٹ کاریم اٹ اتنگ خواہک، سینیٹ گچین کاری آن مست اپوزیشن استیفہ تفک۔ داخیال آتا درشانی ءِ او پنچ شنبے نادے آ داڑے ڈائریکٹوریٹ آف امیگریشن اینڈ پاسپورٹ نا دورہ، بریفنگ آن پد میڈیا تون گپ وتران کرسا کرے۔ وزیر داخلہ پارے کہ امیگریشن اینڈ پاسپورٹ نا کیہی آفیسر سال آتیان پیشن نا ملک آتیٹی تولوک ءُ، اوفتے پدی اتنگک۔ دا چرجوئی ٹی پرمان کرینن۔ اوپارے کہ دے ٹک نیامی آ ہنوک آ خواری کش آتے پاسپورٹ و ویزہ نا معیاد چٹنگ نا سوب آن بھاز مشکل پیش بریک۔ نن فیصلہ کرینن کہ مسہ ہزار فیس اٹ ہی اوفتے 10 سال اکن پاسپورٹ جاری کننگک تانکہ اوفتے وار وار آ پاسپورٹ نا پوسکنی کن چکرخلوئی تمپ۔ وزیر داخلہ پارے کہ 28 اپریل آن پوسکن و جدید ای پاسپورٹ لانچ کننگ والا ءِ ہراٹی مچ آ ڈیٹا مریک۔ داڑآن پاکستانی پاسپورٹ نا قدر ودک۔ یکم جنوری آن مچ آ دنیا نا 191 ملک آتیٹی ای سروس نا بناءِ کننگ اُن۔ اینو آن ایس ایم ایس سروس نا بناءِ کننگ انگ ءِ تانکہ پاسپورٹ نا معیاد چٹنگ آن مست خبڑدار کننگے و شاری وخت آ پاسپورٹ ءِ پوسکن کرفنگ کے۔ اوپارے کہ آن لائن پاسپورٹ سروس اٹ زرس وخت لگک۔ دا چرجوئی ٹی گام گیج کننگ اُن۔ اوخبڑدار کرے کہ اسمگل مروک پٹرولیم مصنوعات بہاکروک 7 دے انا تہہ ٹی دا چرجوئی ءِ بند کیر، ورنہ اوفتا پمپ ءِ بند کننگک۔ اوپارے کہ 120 دے انا تہہ ٹی ایکسپریس پاسپورٹ نا بناءِ کینہ ہرانا کمک اٹ اسہ دے اٹی پاسپورٹ ءِ دوئی کننگ مریک۔ پاسپورٹ آتا ہوم ڈلیوری اسلام آباد اٹی کننگ انگ ءِ۔ راولپنڈی ٹی ہم اودے دمدستی وڑاٹ بناکننگک۔ اسہ سوج اسے نا ورندی ٹی اوپارے کہ اقتصادی راہداری آ کاریم کروک آ چیی شاری تے ویزہ غاتا جاری کننگ کن نظام ءِ گچین کینہ۔ ای سی ایل نا بابت سوج آ اوپارے کہ کابینہ کنا کماشی ٹی چار باسکی کمیٹی اس جوڑ کرینے، داوخت آ ایف آئی اے نا بلیک لسٹ اٹ 66 ہزار و امیگریشن و پاسپورٹ نا لسٹ اٹ 44 ہزار پن ساڑی ءُ۔ امیگریشن اینڈ پاسپورٹ نا زرگزرانی حالیت خراب ءِ انتئے کہ 6،6 ارب نا جاگہ غا 2،2 ارب نا بجٹ ملا۔ اوفتا حالیت ءِ گچین کینہ۔ امیگریشن اینڈ پاسپورٹ کن بھلو فنڈنگ اسے نا گرج ءِ۔ مولانا فضل الرحمان نا سیکورٹی نا بابت سوج انا ورندی ٹی وزیر داخلہ پارے کہ مولانا فضل الرحمان نا سیکورٹی ءِ پدی ہلپننگ انگ ءِ۔ 20 بندغ نا فہرست اٹ اونا پن سرفہرست ءِ۔ کنا کاریم معلومدار کننگ ءِ ہرادے ای کریٹ۔ دُن مف کہ پگہ کنے آ مقدمہ اس جوڑ مرے، دُن کہ بینظیر کیس اٹ کننگاکہ ہرافک سلامتی نا خطرہ غاتیان معلومدار کریر اوفتے ہی پندار کننگا۔
