بنجاھی وزیر توکی کار شیخ رشید احمد ءَ پٹرول ءِ شپوک آناں یک ھپتگے ءِ   وھد داتگ

اسلام آباد۔23دسمبر  (اے پی پی): بنجاھی وزیر توکی کار شیخ رشید احمد  ءَ پٹرول ءِ شپوک آناں یک  ھپتگے ءِ وھد داتگ ءُ گوشتگ کہ گیر کانودی کار  آں گوں دست مانجنیں مردم   آنی ھلاپ ءَ ترندی ءَ گوں  کاروائی کنگ بیت، مزن وزیر ءَ  منا سرجمیں ملک ءَ سمگلنگ ءِ پٹرول ءِ بھا ءُ سیم  کنگ ءِ زوتاں زوت بند کنائینگ ءِ زمہ واری داتگ، شپوکی ءَ چہ اتکگیں پٹرول بھا بوھوکیں پٹرول پمپ آنی  لائسنس آناں  زبت کناں۔ آئی ءَ اے ھیالانی درشانی چار شمبے ءَ مزن وزیر عمران خان ءِ سروکی  ءَ  دیوان ءَ چہ پد اھوالکاراں گوں تران کنان ءَ کت۔ دیوان ءَ سمگلنگ  ءِ گر ءُ دار ءُ ھاسیں  رنگ ءَ ٹیل ءِ شپوکی ءِ  ھوالگ ءَ جیڈھ آنی سر ءَ چار  ءُ تپاسی  گرگ بوت۔ دیوان ءَ بنجاھی وزیر توکی کار، بنجاھی وزیر  ھزانگ، بنجاھی وزیر زرئی کار، مشیر تجارت، چیئرمین ایف بی آر ءُ ٹوھ ٹوھیں  اپسرگگ آں  بھر زوری کت۔ شیخ رشید احمد ءَ گوشت کہ اے  یک ارزشتی ایں سیاسی فیصلہ ات ءُ مزن وزیر عمران خان ءَ  آئی ءَ را اے زمہ واری داتگ آ زوتیں رد ءَ سرجمیں ملک ءَ شپوکی ءَ چہ اتکگیں ٹیل ءِ بھا ءَ را بند بکن انت چیا کہ ایشی ءَ چہ ملکی معیشت ءَ را  سک باز تاوان رسگ ءَ انت۔  شیخ رشید  احمد ءَ گوشت کہ مزن مزن وزیر ءَ ملک ءَ موبائل فونز آنی شپوکی ءَ را گر ءُ دار ءِ وسیلگ ءَ 2 ارب ڈالر ءِ ریونیو رکھینگ ءُ سمگلینگ بوتگیں  گد ءُ پوشاک آنی گر ءُ دار ءِ وسیلگ ءَ  اربانی کلدار   بچارینگ ءِ پد ءَ  ایف بی آر ءِ کرد ءَ را ساڑاتگ۔ آئی ءَ گوشت کہ  اے وڑیں گتوامیں پٹرول پمپ  ھما کہ شپوکی ٹیل بھا کن انت  یا اے کار ءِ  تہ ءَ  دست مانجن انت  آوانی ھلاپ ءَ ھپت روچ ءِ اندر ءَ کاروائی کنگ بیت  ءُ آوانی لائسنس آناں ضبط کنگ بیت ءُ  آواناں  دوارگ پٹرول پمپ چلائنگ ءِ اجازت نامہ دیگ نہ بیت۔ شیخ رشید احمد  ءَ گوشت کہ حکومت ءِ اے گامگیج ءَ چہ  کساس 2 ارب ڈالر  بچت بیت۔ آئی ءَ گوشت کہ مزن وزیر  ءَ ایف بی  آر ءَ را اے زمہ واری داتگ کہ آ ھپت ارب ڈالر ءِ  شپوکی ءَ را  گر ءُ دار ءِ واستہ گامگیج بکنت۔