اسلام آباد۔ 23 دسمبر (اے پی پی) وزیراعظم نا خصوصی کمکار احتساب بیرسٹر شہزاد اکبر پارینے کہ برطانیہ غان مسکوہی وزیراعظم نواز شریف نا پدی اتنگ کن خواست کننگانے، سلیم مانڈوی والا سینیٹ نا پلیٹ فارم ءِ تینا فائدہ کن کاریم اٹ اتپ۔ چارشنبے نادے آ داڑے پریس کانفرنس آن تران کرسا اوپارے کہ برطانیہ غان نواز شریف ءِ پدی اتنگ کن پاننگانے ہرا اسہ سزا کنوک ءُ بندغ اسے، برطانوی حکومت باوری کرفینے کہ نواز شریف نا ویزہ نا ودکی نا وخت آ دا معاملہ نا جاچ ءِ ہلنگک۔ بیرسٹر شہزاد اکبر پیدوار کرے کہ پی ٹی آئی حکومت اپوزیشن ءِ این آر او تفک۔ نیب آ ڈپٹی چیئرمین سینیٹ سلیم مانڈوی والا نا دوبہ غاتا بابت اوپارے کہ ڈپٹی چیئرمین سینیٹ دھڑکو تف، اودے دا عہدہ کانودسازی کن ملانے، او سینیٹ پلیٹ فارم ءِ تینا فائدہ کن کاریم اٹ اتپ۔ خصوصی کمکار پارے کہ اپوزیشن فیٹف ءِ جھیڑہ ئی کننگ نا کوشست کرے۔ پی ڈی ایم نا ودی مننگ نا بابت اوپارے کہ مالیاتی نظام اٹ شفافیت کن فیٹف وڑوڈول اس جوڑ کرے و دا ہدف آتا دوئی کننگ کن کانود سازی نا گرج ئس ہراڑکن اپوزیشن نا کمک درکار ئس ولے اپوزیشن فیٹف آ ترمیم نا منظوری کن شڑت تخا ہرااسہ وڑاٹ معافی خواہنگ نا کوشست اس ئس، اگہ نیب کانود اٹ اوفتا 34 ترمیم آ دستخط کریکہ تو شہباز شریف وآصف زرداری نا کیس چٹاکہ۔ اوپارے کہ اپوزیشن پاہک کہ اسہ ارب روپئی آن کم انا کیس اس مرے تو نیب ہلپ، دافک غیر کانودی میرات و پیسہ غاتیا معافی خواہنگ خوائسرہ کہ اوفتا نابودی نا سزا 10 سال آن کم کرسا 5 سال کننگے، اپوزیشن بارگین نا بھاز کوشست کرے ولے حکومت داوڑکننگ آن انکار کرے اوکان پد پی ڈی ایم ودی مس، دافک پورو وڑاٹ بے نقاب مسنو، اوفتا ایجنڈا بیرہ این آر او پلس پلس ءِ۔ اوپارے کہ سلیم مانڈوی والا تون عہدہ اسہ انامت اسے۔ سینیٹ اٹی جند انا فائدہ کن آخا بلکن الس کن کانود سازی مریک، ڈپٹی چیئرمین سینیٹ تینا دفتر ءِ تینا فائدہ کن کاریم اٹ اتنگ کپک۔ اوپارے کہ سلیم مانڈوی والا ادارہ غاتے دھڑکوتننگ ءِ ہرا پارلیمنٹ نا باسک آتا شان اف۔ اوپیدوار کرے کہ پی ٹی آئی نا حکومت ادارہ غاتا بے شرفی ءِ سگپک و پبی ورندی ایتک۔ اوپارے کہ برطانیہ تون بندی تا ہڷ و تس انا معاہدہ فعال مسنے، دا معاملہ اوفتا ءِ ہرا پاکستان اٹ کانود نا رداٹ درکار ءُ، نواز شریف نا معاملہ اوڑآن جتا ءِ انتئے کہ او سزاکنوک ءُ بندغ اسے، مسکوہی وزیراعظم درمان نا شڑت آ برطانیہ غا ہناسس۔
