اسلام آباد۔ 23 دسمبر (اے پی پی) بنجائی وزیرخزانہ ڈاکٹر عبدالحفیظ شیخ تون پاکستان اٹ آسٹریلیا نا ہائی کمشنر ڈاکٹر جیفری شانے ورچوئل گپ وتران کرسا پارے کہ پاکستان نا کچ انا رداٹ آسٹریلیا پاکستان تون واپاری رابطہ غاتیٹی ودکی نا خواہندار ءِ۔ وزارت خزانہ نا کنڈآن چارشنبے نادے آ جاری پریس ریلیز نا رداٹ ہائی کمشنر پارے کہ پاکستان اسہ بھلو آبادی، متنوع وسیلہ و واپار نا لامحدود وارخواہی تتون علاقائی مارکیٹ نا نیام اٹ واقع ءِ۔ اومستی پارے کہ آسٹریلوی حکومت آسٹریلین ایڈپروگرام تا رداٹ و تعلیم نا بابت پاکستان الس آ زرکاری کیک۔ اوداعزم انا ہم درشانی ءِ کرے کہ پاکستان تون کمکاری ءِ برجاتخنگے و خاص کر کوویڈ۔ 19 نا ساڑی آ ریسہ ٹی دین آن رکھ اکن داٹی پین ودکی کننگک۔ داوخت آ بنجائی وزیر خزانہ ڈاکٹر عبدالحفیظ شیخ کمکاری نا فراوانی آ آسٹریلوی حکومت و ہائی کمشنر نا کوشست آتا ستاءِ کرے ہرا او پاکستان و پاکستانی الس کن کننگ ءِ۔ اودااومیت نا ہم درشانی ءِ کرے کہ ہڑتوم آ ملک آتا تین پہ تینی فائدہ کن آخبت اٹ ہم شریداری نا عمل برجاسلک۔ بنجائی وزیر آسٹریلوی ہائی کمشنر نا کمک و تین پہ تینی اقتصادی رابطہ غاتیٹی ودکی نا عزم آ اونا منت واری ءِ ہرفسا پارے کہ کورونا دین انا جہانی دین انا چٹنگ آن پد ہراتم جہانی واپار بحال مریک تو پاکستان و آسٹریلیا نا تین پہ تینی تعلقداری و واپاری رابطہ غاتیٹی خاطرخواہ ودکی مریک۔
